भांगरभूंय | प्रतिनिधी
जुलय सावन दिव्यांगांचें सर्वेक्षण
भांगरभूंय । प्रतिनिधी
पणजी : गोंयांतल्या दिव्यांगांचें सर्वेक्षण जुलय सावन सुरू जातलें, अशी म्हायती दिव्यांग खात्याचे मंत्री सुभाष फळदेसाय हांणी दिली. केंद्र सरकारा कडल्यान मेळिल्ले म्हायती प्रमाण गोंयांत 12 टक्के दिव्यांगजन आसात. मात सर्वेक्षणा उपरांत तांचो आंकडो कळटलो, अशें तांणी सांगलें.
दिव्यांगांचे विवीध प्रकार आसता. सरकारान दिव्यांगांचें सर्वेक्षण करपा खातीर खासगी एजन्सीची नेमणूक केल्या. सोपस्कार पुराय जाले उपरांत काम सुरू जातलें. दिव्यांग विद्यार्थ्यांचें प्रमाण 3 ते 4 टक्के आसपाची शक्यताय आसा. दिव्यांग विद्यार्थ्यांची म्हायती शिक्षण खात्या कडल्यान घेतले. शिक्षण खातें विवीध विद्यालयां तशेंच मुळाव्या शाळांतल्यान दिव्यांग विद्यार्थ्यांचो आंकडो घेतलें. हाका लागून दिव्यांग विद्यार्थ्यांचो आंकडो बेगिनूच कळटलो.
हेर दिव्यागांचें सर्वेक्षण मात घराघंनी वचून करतले. पंचायत, नगरपालिकांचे मजतीन घरांक भेट घेवन म्हायती घेतले. आयकुपाक सारकें ये ना, वा दोळ्यांनी दिसना, हे विशींच्या दिव्यागांच्या प्रकाराची म्हायती नोंद जातली. एजन्सी आनी दिव्यांग खातें मेळून सर्वेक्षण करतलें. हाका थोडो वेळ लागतलो, अशी म्हायती खात्याच्या अधिकाऱ्यांनी दिली. दिव्यांगां खातीर केंद्र तशेंच राज्य सरकारच्यो साबार येवजण्यो आसात. ह्या येवजण्यांचो लाव पावोवपा सयत सुविधा तयार करपा खातीर लेगीत सर्वेक्षण लाभकारी थारतलें. खंयच्या वाठारांत कितले दिव्यांग आसात आनी ते कसल्या प्रकारचे आसात, ताची आंकडेवारी वा म्हायती उपलब्ध ना. ही म्हायती उपलब्ध जाले उपरांत येरादारी तशेंच भलायकीच्यो सुविधा उपलब्ध करप शक्य जातलें. दिव्यांगजना खातीर पर्पल फेस्ट महोत्सव जाता. ह्या महोत्सवाक कितले दिव्यांगजन पावतात, ताचें प्रमाण कळपाक मजत जातली. सर्वेक्षणाक कळाव जातलो मात हें जावप गरजेचें आसा, अशें मंत्री फळदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
