भांगरभूंय | प्रतिनिधी
वजन आनी माप खात्याची कारवाय
वास्को: वजन आनी माप खात्यान फाटल्या पांच दिसांत गोंयांतल्या विवीध वाठारांनी कारवाय करून सुमार धा लाख रुपयांचो म्हाल जप्त केलो. ही कारवाय अशीच चालू उरतली अशें खात्याचे अधिकारी नितीन पुरुशन हांणी सांगलें.
मुरगांव म्हालांतल्या कांय विक्रेत्यां आड कारवाय करून तांचे कडलो म्हाल जप्त केलो. गोंयच्या विवीध वाठारांनी 43 जाणां आड कारवाय केल्या.
कांय बंद पाकिटांनी नमूद केल्ल्या वजना परस उणो म्हाल भरप सारकिल्ल्यां आडूय कारवाय केल्या. तातूंत मिठाय, सुको मेवा बी म्हाल विक्रेत्यांचो आस्पाव आसा. कांय पाकिटांचेर मोलां खोडिल्लीं वा मोल नमूद करूंक नाशिल्ल्याचें दिसून आयले उपरांत संबंदीत म्हाल जप्त केला.
विक्रेत्यांनी गिरायकांक म्हाल विकतना तांची फटवणूक जावची ना हाचे कडेन लक्ष दिवपाची गरज आसा. पाकिटाचेर वा बॉक्साचेर उत्पादकाचें नांव, नामो, जर म्हाल निर्यात केल्लो आसत जाल्यार त्या निर्यातदाराचें नांव, पत्तो, देशाचें नांव, उत्पादन केल्ली तारीख आनी वर्स तशेंच संबंदीत म्हाल खंयचे तारखे मेरेन आनी वर्सा मेरेन वापरूंक शकता. त्या वस्तूंची अधिकतम किरकोळ मुल्य हांची म्हायती आसप गरजेची आसा.
तेच प्रमाण आतां कंज्युमर केर संबंदींचीय म्हायती नमूद करपाची गरज आशिल्ल्याचें पुरुशन हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
