भांगरभूंय | प्रतिनिधी
पणजीः शुक्रारा राज्यांत तुरळक पावस पडलो. राज्यांत दीसभर पावसाचो खेळ चालूच आशिल्लो. हवामान खात्यान आयज (31 ऑगस्ट) मात्सो पावस पडपाचो अदमास काडला. 1 ते 3 सप्टेंबर ह्या काळांत मध्यम पावस पडपाची शक्यताय सांगून येलो अलर्ट जारी केला. 24 वरांत सरासरी 1.13 इंच पावस पडलो. मजगतीं, केपे शारांत 1.57 इंच आनी सांगें 1.48 इंच पावसाची नोंद जाल्या.
गोंयांत 1 जून ते 30 ऑगस्ट ह्या काळांत सरासरी 153.40 इंच पावस पडला. अंदूं पावसाचें प्रमाण 45.9 टक्क्यांनी चड आसा. ह्या काळांत वाळपय सगळ्यांत चड 195.89 इंच पावस पडला. हाचे उपरांत सांगें 186.55 इंच, सांखळे 166.86 इंच, केपें 166 इंच, पेडणें 156.86 इंच, पोरणें गोंय 151.30 इंच, फोंडें 149.58 इंच आनी काणकोण 148.31 इंच पावसाची नोंद जाल्या.
हवामान खात्यान दिल्ले म्हायती प्रमाण शुक्रारा पणजे चडांत चड तापमान 1.2 अंश वाडून 30.5 अंश सेल्सियस जाला. जाल्यार उण्यांत उणें तापमान 25.5 अंश सेल्सियस आशिल्लें. मुरगांवां चडांत चड तापमान 31.4 डिग्री सेल्सियस जाल्यार उण्यांत उणें तापमान 25.8 डिग्री सेल्सियस आसा. फुडल्या पांच दिसां खातीर राज्यांत चडांत चड तापमान 29 ते 32 अंश आनी उण्यांत उणें तापमान 25 ते 26 अंश आसपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
