भांगरभूंय | प्रतिनिधी
पणजीः गोंयांत तीन वर्सांच्या काळांत २० हजार मेट्रीक टन परस सेंद्रीय सार्याचें उत्पादन जालां. गोंय हें सारें तयार करपांत केरळ सारकिल्लें व्हड राज्य आनी इशान्य राज्यां परस फुडें आसा, अशी म्हायती केंद्रीय शेतकी आनी शेतकार कल्याण राज्य मंत्री रामनाथ ठाकूर हांणी दिली.
लोकसभेच्या पटलार लेखी जापेंत ठाकूर हांणी सांगलां, परंपरागत कृशी विकास येवजणे खाला सगल्या राज्यांनी सेंद्रीय शेतीक उर्बा दिता. हे येवजणे वरवीं सेंद्रीय शेतींत गुंथिल्ल्या शेतकारांक फावो तितलो तेंको जशें, उत्पादन ते प्रक्रीया, प्रमाणीकरण आनी मार्केटींग मजत दिता.
गोंय राज्यांत वर्स २०२२-२३ ते २०२४-२५ ह्या तीन वर्सांच्या काळांत २०,१८० मेट्रीक टन सेंद्रीय सार्याचें उत्पादन जालां. मात तीन वर्साच्या काळांत ह्या उत्पादनांत घट जायत आसा. वर्स २०२२-२३त ११,२२१ मेट्रीक टन सार्याचें उत्पन्न जाल्लें, वर्स २०२३-२४त कसलेंच उत्पादन जावंकना आनी वर्स २०२४-२५त ८९५९ मेट्रीक टन सार्याचे उत्पन्न तयार जाला.
जाल्यार सेंद्रीय सारें तयार करपांत गोंय राज्य हें केरळ, ओडीशा, मणीपुर, त्रिपुरा ह्या राज्यां परस खूब फुडें आसा.
हे येवजणे खाला सेंद्रीय शेतीक उर्बा दिवपा खातीर रु. ३१,५०० दर हॅक्टर इतलें अर्थीक मजत तीन वर्साच्या काळा खातीर दितात. तातुंतले रु. १५ हजार दर हॅक्टर इतलें सहाय्य डायरेक्ट बेनिफीट ट्रान्सफर वरपी शेतकी उपकरणां खातीर मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
