भांगरभूंय | प्रतिनिधी
पणजी : राज्यांत २०२० सावन १५ जून २०२४ मेरेन गोंयच्या ५५ खांप्या गुंडांक धांवडावपाची (तडीपार करप) जिल्लोधिकार्यांनी प्रक्रिया सुरू केल्या. तशेंच वयल्या काळांत गोंयांत १४९ खांप्या गुंडांची नोंद जाल्या, अशी म्हायती मुख्यमंत्री डॉ. प्रमोद सावंत हांणी लेखी जापेंत दिली.
हे विशीं विरोधी पक्ष फुडारी युरी आलेमाव हांणी प्रस्न विचारिल्लो. आमदारान राज्यांत विवीध पुलीस स्टेशनांत २०२० सावन १५ जून २०२४ मेरेन कितल्या खांप्या गुंडांचेर कारवाय केल्ल्याची म्हायती मागिल्ली. तशेंच वयल्या काळांत कितल्या जाणांक तडीपार केल्यात, ताची म्हायती मागिल्ली.
सगळ्यांत चड मडगांव पुलीस स्टेशनांत १९ सरायत गुंडांची नोंद जाल्या. उपरांत वास्को पुलीस स्टेशनांत १४, कळंगूटे १२, मायणा- कुडतरें आनी वेर्णा दरेकी १०, म्हापशें आनी वाळपय दरेकी ८, फोंडें ७, कोलव्यां आनी कुंकळ्ळें दरेकी ६, साळगांवां, दिवचल आनी फातोड्ड्यां दरेकी ५, पोरणें गोंय आनी केपें दरेकी ४, पणजी, मुरगांव, पेडणें, मांद्रें, काणकोण दरेकी ३, म्हाड्डोळ, कुळें, कुडचडें, हणजूण दरेकी २, जाल्यार आगशी, पर्वरे, सांगें दरेकी १ मेळून १४९ खांप्या गुंडांची नोंद जाल्या. तांतल्या ५५ जाणांक तडीपार करपाची प्रक्रिया जिल्होधिकार्यांनी सुरू केल्या.
सगळ्यांत चड वेर्णा आनी मडगांव पुलीस स्टेशनांतल्यो दरेकी ६ जाणांक तडीपार करपाची प्रक्रिया सुरू केल्या. तशेंच कोलवा, वास्को आनी कुंकळ्ळी दरेकी ५, म्हापशें ४, पणजी आनी मायणा – कुडतरें दरेकी ३, कळंगूटे, दिवचल, फातोड्ड्यां, केपें, कुडचडें आनी फोंडें दरेकी २, जाल्यार मुरगांव, सांगें, पेडणें, साळगांव, पर्वरे आनी पोरणें गोंय दरेकी १ मेळून ५५ खांप्या गुंडांची तडीपार करण्याची प्रक्रिया सुरु केल्ल्याची म्हायती लेखी जापेत दिल्या.
तशेंच थळाव्या पुलिसां वरवीं खांप्या गुंडांच्या घरा वचून तांची चवकशी करतात. तशेंच तांकां पुलीस स्टेशनाचेर आपोवन तांची चवकशी करतात. तशेंच वाठारांत शांती तशेंच कायदो आनी सुवेवस्था राखपा खातीर तांची तपासणी करतात. तशेंच तांच्यो कॉल डिटेस्ल आनी हेर म्हायती तपासून तांचेर पाळत दवरतात अशी म्हायती लेखी जापेंत दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
