भांगरभूंय | प्रतिनिधी
पणजी: गोंयांत भांगर आनी रुप्याचें हॉलमार्क केल्ल्या भांगराची विक्री करपा खातीर भारतीय मानक ब्युरो (बीआयएस) 423 जाणांनी नोंदणी केल्या. हातूंत 386 भांगराचें जाल्यार 37 रुप्याच्यो वस्ती विक्री करप्यांचो आस्पाव आसा. गोंयांत बीआयएस प्रमाणीत हॉलमार्क करपी 3 केंद्रां आसात. आडवाद सोडून चडश्या भांगराच्या वस्तींचेर हॉलमार्क आसप गरजेचें आसता. हाका लागून भांगराची शुद्धताय, दर्जो आनी गुणवत्ता समजूंक मजत जाता. बीआयएसान हालींच जारी केल्ल्या अहवालांतल्यान ही म्हायती मेळ्ळ्या.
मेळिल्ले म्हायती प्रमाण पुराय देशांत 1.85 लाख भांगराचें जाल्यार 18 हजार 289 रुप्याचें अशा वट्ट 2.03 लाख भांगर विक्रेत्यांनी नोंदणी केल्या. देशांत बीआयएस हॉलमार्क करपी 1602 केंद्रां आसात. महाराष्ट्रांत सगल्यांत चड 34 हजार भांगर विक्रेत्यांनी नोंदणी केल्या. हातूंत 32 हजार भांगराच्यो वस्ती करपी आसात. उपरांत अस्तंत बंगालांत 31 हजार, तमीळनाडू आनी गुजरातांत दरेकी 16 हजार, उत्तर प्रदेशांत 14 हजार, कर्नाटकांत 9 हजार जाणांनी नोंदणी केल्या. मिझोरामांत सगल्यांत उणी म्हणल्यार चार जाणांनी बीआयएस कडेन नोंदणी केल्या.
केंद्र शासीत प्रदेशांचो विचार करीत जाल्यार दिल्लींत सगल्यांत चड 7 हजार जाणांनी नोंदणी केल्या. जाल्यार लडाखांत सगल्यांत उणे म्हणल्यार फक्त एकल्यानूच अशी नोंदणी केल्या. केंद्र सरकारान 2016 वर्सा बीआयएस कायदो हाडिल्लो. जून 2021 उपरांत भांगराचेर हॉलमार्क आसप गरजेचें केल्लें. पयल्या टप्प्यांत 14, 18 आनी 22 कॅरेटच्या भांगरा खातीर हें गरजेचें केल्लें. जुलय 2025 उपरांत 14, 18, 20, 22, 23 आनी 24 कॅरेटच्या भांगराच्या वस्तीं खातीर हॉलमार्कींग गरजेचें केल्लें.
ह्या वस्तींक हॉलमर्क गरजेचें ना
– दोन ग्रामा परस उण्या वजनाचें भांगर.
– वैजकी, दंत, पशूसंवर्धन, शास्त्रीय वा उद्देगीक कारणां खातीर वापरतात तें भांगर.
– भांगराची वीट, प्लेट, पत्रो, सळी, ट्यूब वा नाणें.
– आंतरराष्ट्रीय प्रदर्शनांत प्रदर्शीत करतात तें भांगर.
– कुंदन, पोल्की आनी जडाव पद्दतीचें भांगर.
– वर्सुकी उलाढाल 40 लाख मेरेन आशिल्ले भांगर विक्रेते.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
