भांगरभूंय | प्रतिनिधी
पणजीः गोंयांत हिंसक सुण्यांच्या जातींचेर बंदी घालपाचे यत्न परतून सुरू जाल्यात. राज्य सरकारान हिंसक सुण्यांच्या जातींचेर बंदी घालपाचो निर्णय घेतला. फाटल्या वर्सा प्राणीमोगी संघटनांचो विरोध जाल्ल्यान हाचेर निर्णय घेवप शक्य जालें ना. सुत्रांनी दिल्ले म्हायती प्रमाण, पशुपालन खातें हे संबंदी लोकां कडल्यान सुचोवण्यो आनी कायदेशीर सल्ले घेवन चर्चा केले उपरांत बेगीनूच अधिसुचोवणी जारी करपाचे आसा. संभाव्य वळेरेंत पिटबुल, रॉटवेलर आनी हेर कांय जातींचो आस्पाव आसा.
प्राणीमोगी आनी संबंदितांच्या हरकतींचो विचार करूनच सरकार निमाणो निर्णय घेतलो अशें वरिश्ठ अधिकाऱ्यांनी स्पश्ट केलें. लोकांची मतां घेवन आनी फुडाराक कायदेशीर आव्हानां टाळपा खातीर कायदेशीर सल्लो घेतात अशें एका अधिकाऱ्यान सांगलें. सरकाराची मान्यताय मेळ्ळे उपरांत अधिसुचोवणी जारी करून बंदी अधिकृतपणान चालीक लायतले.
फाटल्या फेब्रुवारींत पिटबुल आनी रॉटवेलर सयत आक्रमक अशा धा जातींचेर निर्बंध वाडोवपाचे सरकारान म्हणिल्लें. पूण सध्याच्या प्रस्तावांत ‘कायदेशीर आनी वेव्हारीक मुल्यांकन’ केले उपरांत ही वळेरी मर्यादित केल्या अशें सूत्रांनी सांगलें.
आयात आनी प्रजननाचेर बंदी
अधिसुचोवणी लागू जाले उपरांत संबंदीत जातीच्या सुण्यांची आयात आनी प्रजनन करपाक परवानगी दिवचे ना. पूण आदींच अस्तित्वांत आशिल्ल्या सुण्यांचेर नसबंदी (स्टेरिलायझेशन) सक्तीचें करतले. ताका लागून फुडलें प्रजनन बंद करूं येता. तशेंच नगरपालिका आनी ग्रामपंचायती कडल्यान सुरु आशिल्ल्या पाळीव आनी रस्ताद जनावरांची नोंदणी करपाचे प्रक्रियेंत अशा सुण्यांची अधिकृत नोंदणी करप सक्तीचें आसा.
नेमाचें उल्लंघन केल्यार दंड
बंदी आशिल्ल्या जातींचें प्रजनन करपी वा तांकां प्रोत्साहन दिवपी लोकांचेर दंडात्मक कारवाय करपाचो प्रस्ताव आसा. मजगतीं, राज्य निरिक्षण समितीन पाळीव सुण्यांची सक्तीची नोंदणी आनी नसबंदीची शिफारस केल्ली. स म्हयन्यां भितर नसबंदी करूंक ना जाल्यार दंड घालपाचो प्रस्तावय प्रलंबीत आसा. नोंदणी शुल्क आनी दंड हांचे विशीं वेगळ्या प्रस्तावाकूय सरकाराची निमाणी मान्यताय मेळपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
