भांगरभूंय | प्रतिनिधी
पणजीः पर्यटकांच्या जिवाक धोको निर्माण करून चलपी हवाई खेळां खातीर राज्य सरकारान खर नेम केल्यात. नेमाचें उल्लंघन केल्यार 2 लाख रुपया मेरेन दंड भरचो पडूं येता. तशेंच उपकरणां जप्त करपा वांगडाच परवानोय रद्द जावं येता. पायलट आनी प्रवाशाक उण्यांत उणो 15 लाख रुपया वैयक्तीक अपघात विमो दिवप ऑपरेटर्सांक सक्तीचें केलां.
हे संबंदी गोंय पर्यटन खात्यान नवे ‘गोवा एअरो स्पोर्ट्स नेम 2025’ (Goa Aero Sports Rules, 2025) अधुसूचित केल्या. सुरक्षेच्या नेमाचें उल्लंघन केल्यार खर ख्यास्त दिवपाची तरतूद तातूंत आसा. गुन्यांवा प्रमाण आनी परतून परतून तशें केल्यार 2 लाख रुपया मेरेन दंड, कायम काळ्या वळेरेंत घालप, उपकरणां जप्त करप आनी नोंदणी वा परवानो रद्द करपाची तरतूद आसा.
नव्या नेमा प्रमाण, ऑपरेटर्सांक पर्यटन खात्या कडेन नोंदणी करची पडटली आनी काम सुरू करचे पयलीं वैध नोंदणी प्रमाणपत्र घेवचें पडटलें. थारायिल्ले शुल्क दर विमानाक 1 लाख रुपया, दर हंगामाक (ऑक्टोबर ते 31 मे) दर ‘टँडम पायलट’ 10 हजार रुपया, परकी पायलटांक दरेकीं 2,500 रुपया आनी भारतीय पायलटांक 1 हजार रुपया अशें आसात. हे चार म्हयने वैध आसा.
गरजेच्या उड्डाण वरां सयत फकत प्रशिक्षीत आनी परवानो आशिल्ल्या ‘टँडम पायलटांक’ वेवसायीक रितीन काम करपाक मेळटलें. तशेंच अपघात जाल्यार राज्य सरकाराक वैजकी वा बचाव खर्चाच्या जापसालदारकींतल्यान मुक्त करपा खातीर ऑपरेटर्सांक बॉण्ड भरचो पडटलो.
हवाई खेळां मळार हालीं कांय अपघात जाल्यात, तातूंत मरण आयिल्ल्यांचोय आस्पाव आसा. ह्या कारणाक लागून सुरक्षेच्या नदरेन हे नवे नेम तयार केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
