भांगरभूंय | प्रतिनिधी
पणजी: हनिमुना खातीर गोंयांत आयिल्ल्या घोव-बायले मदीं वाद जालो. उपरांत दोगांय मदीं मारपेट जाली. उपरांत घोवाक गोंयांतूच सांडून बायल विमानान घरा परतली. घरां परतूच तिणें घोव आनी सासरच्या लोकां आड पुलिशेंत कागाळ केली. ‘म्हाका म्हज्या घोवान मारपेट केली आनी जीवे मारपाचो यत्न केलो’ असो आरोप हे बायलेन केलो.
नेमकें कितें जालें?
उत्तर प्रदेशांतल्या महाराजगंजच्या एका जोडप्याचें लग्न जालें. उपरांत हीं दोगांय हनिमुना खातीर गोंयांत आयलीं. मात गोंयांत पावतांच ह्या जोडप्या मदीं झगडें पेटलें. उपरांत घोवान तिका मारपेट केली. पिडेस्त बायल उत्तर प्रदेशांतल्या कोतवाली शारांत रावपी. तिणें सांगिल्ले प्रमाण १२ फेब्रुवारीक तिचें लग्न जालें. तिच्या घोवाचें नांव रमेश. लग्न उपरांत घोव रमेश आनी ताच्या घरच्यांनी आपलो छळ केलो.
पुलिसांनी कितें सांगलें?
पुलिसांनी दिल्ले म्हायती प्रमाण १९ फेब्रुवारीक हें जोडपें हनिमुना खातीर गोंयांत आयिल्लें. उपरांत २२ फेब्रुवारीक बायल रमेशाक गोंयांतूच सोडून आपल्या गांवां परतली. हनिमुना वेळार घोव रमेशान आपल्यान मारपेट केली आनी जीवें मरपाचो यत्न केल्ल्याचो आरोप तिणें केला. ही सगळी घडणूक घडले उपरांत २२ फेब्रुवारीक ती बायल कुळारा गेली. तिचें सगळें म्हणणें आयकले उपरांत तिच्या कुळारच्या लोकांनी तिचो घोव रमेश आनी सासरच्या हेर लोकां आड पुलिशेंत कागाळ दाखल केली. रमेशान म्हजो गळो दामून म्हाका मारून उडोवपाचो यत्न केलो असो आरोप तिणें पुलिशेंत केलो. पुलीस हे विशीं फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
