भांगरभूंय | प्रतिनिधी
-मणक्याच्या उपचारां खातीर गोंयकार दुयेंतींक व्हड आदार
पणजीः गोंय राज्य दिव्यांग आयुक्त कार्यालय, हॉस्पिटल-बांबोळी आनी नवी दिल्लींतल्या संवसारीक नामनेच्या भारतीय मेरुरज्जू (मणक्याचें दुयेंस) केंद्राच्या पालवान गोंयांत मेरुरज्जू रिहाब सेंटर (स्पाइनल कॉर्ड रिहाब सेंटर) सुरू केलां. हालींच पणजेंत जाल्ल्या इंटरनॅशनल पर्पल महोत्सव 2024 वेळार सुरू केल्ल्या ह्या केंद्रांत मेरुरज्जू जखमी जाल्ल्या दुयेंतींची व्यापक पुनर्वसन करपा खातीर उपचार सुविधा आसात.
नवी दिल्लींत आशिल्ल्या भारतीय मेरुरज्जू जखमी केंद्राक मेरुरज्जू, आर्थोपेडिक आनी तंत्रिका स्नायू शस्त्रक्रिया केंद्र म्हणून मान्यताय मेळ्ळ्या. ह्या केंद्रांत अत्याधुनीक निदान आनी शस्त्रक्रिया सुविधा आनी आंतरराष्ट्रीय मान्यताय मेळिल्ल्या तशेंच भारतांतल्या आनी परदेशांतल्या मुखेल संस्थांच्या प्रशिक्षीत तज्ञांचो पंगड आसा. मेरुरज्जू संबंदीत सगळ्या समस्यांचेर उपचार सेवा हें केंद्र दिता. तशेंच, आधुनीक वैजकी आनी शस्त्रक्रिया तंत्रज्ञान सेवा दिवपा खातीर आंतरराष्ट्रीय प्रशिक्षीत आनी प्रशंसीत आर्थोपेडिक सर्जनांचो पूर्णवेळ पंगड ह्या केंद्रांत आसा.
सध्या बांबोळेंतल्या ‘स्पाइनल कॉर्ड रिहाब’ सेंटरांत मेरुरज्जूच्या वेगवेगळ्या समस्यांच्या दुयेंतींचेर उपचार सुरू आसात. नवी दिल्लींतल्या मेरुरज्जू जखमी केंद्राच्या सहकार्यान सुरू जाल्लें हें केंद्र दुयेंतींचेर व्यापक उपचार दिता. हाचे खातीर दिल्लीच्या तज्ञांचो पंगड थळाव्या दोतोरां वांगडा हांगा सक्रीयपणान उपलब्ध करून दुयेंतींक पुराय मार्गदर्शन आनी उपचार दिला. दिल्लींतल्या दोतोरांचो पंगड थळाव्या भलायकी वेवसायिकांक प्रशिक्षण दिवपाक आनी पुनर्वसन सेवांचें एकीकरण करपाक सुविधा दिवपाक फुडाकार घेता.
हे संबंदी गोंय राज्य दिव्यांग आयुक्त गुरुप्रसाद पावसकार हांणी म्हणलें, गोंयांतल्या मेरुरज्जू जखमी दुयेंतींचें जिवीत परतून जिवीत करपाची आमची बांदीलकी हो सहकार उपक्रम रेखांकीत करता. बांबोळी हांगाचें मेरुरज्जू पुनर्वसन केंद्र हें गरजेवंत दुयेंतींक दर्जेदार उपचार आनी पुनर्वसन सेवा दिवपाक सरकारी आनी खाजगी संघटनांच्या एकत्रीत समर्पणाची गवाय आसा. इंटरनॅशनल पर्पल फेस्त, गोंय 2024 उपक्रमाच्या जायत्या परिणामां मदलो एक परिणाम म्हूण बांबोळी हांगा सुरू जाल्लें हें केंद्र अशा उपचारा खातीर राज्या भायर उपचार घेवपी गोंयकार दुयेंतींक व्हड आदार थारतलें.
ह्या उपचार सुविधांचो लाव घेवपा खातीर बांबोळी हांगाच्या हॉस्पिटलांतल्यान 9834376962 ह्या नंबराचेर संपर्क सादचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
