भांगरभूंय | प्रतिनिधी
पणजी: गोंयांत 2023 ते 2024 ह्या तीन वर्सांत सोरोप चाबपाच्यो 1398 घडणुकांची नोंद जाल्या. हाचोच अर्थ गोंयांत म्हयन्याक सरासरी 38 म्हणल्यार वर्साक सरासरी 466 सोरपान चाबपाच्यो घडणुको घडल्यात. पूण ह्या तीन वर्सांत सोरपान चाबिल्ल्यान एकल्याकूय मरण आयिल्ल्याची नोंद ना. केंद्रीय भलायकी राज्यमंत्री प्रतापराव जाधव हांणी लोकसभेंत दिल्ले लेखी जापेंतल्यान ही म्हायती मुखार आयल्या. हे विशीं खासदार कोंडा व्ही रेड्डी हांणी अतारांकीत प्रस्न विचारिल्लो.
जापेंत दिल्ले म्हायती प्रमाण वयल्या काळांत पुराय देशांत सोरपान चाबिल्ल्याच्यो 2 लाख 53 हजार 296 घडणुको घडल्यात. हाचोच अर्थ म्हयन्याक सरासरी 7,036 म्हणल्यार वर्साक सरासरी 84 हजार 432 सोरपान चाबिल्ल्याच्यो घडणुको घडल्यात.
ह्याच वेळार तामीळनाडूंत सगल्यांत चड 52 हजार 82 घडणुको घडल्यात. अस्तंत बंगालांत 42 हजार 340 जाल्यार ओडिशांत 30 हजार 721 घडणुकांची नोंद जाल्या. देशांत सगल्यांत उणें प्रमाण अरुणाचल प्रदेशांत आसा. थंय 302 घडणुको घडल्यो.
वयल्या काळांत पुराय देशांत सोरोप चाबिल्ल्यान म्हयन्याक सरासरी 16 म्हणल्यार वर्साक सरासरी 200 मनशांक मरण आयलां. कर्नाटकांत सगल्यांत चड 137 जाणांक मरण आयलां. अस्तंत बंगालांत 93, तामीळनाडूंत 85 जाल्यार ओडिशांत 64 जाणांक मरण आयलां. सोरोप चाबप आडावप आनी नियंत्रणांत हाडप हाचे खातीर केंद्र सरकारान 2024 वर्सा राष्ट्रीक कृती आराखडो तयार केला. राष्ट्रीय भलायकी अभियाना खाला केंद्र सरकार राज्य सरकारांक सोरोप चाबपाची निगडीत वखादं, हेर उपकरणां उपलब्ध करून दिता. तशेंच राज्य सरकारांक प्रशिक्षण जागृताये खातीर निधी दीत आशिल्ल्याचें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
