भांगरभूंय | प्रतिनिधी
पणजी: फाटल्या एका वर्सांत गोंयांतल्या सैमीक स्रोतांतल्या (भूंय जल) उदकाच्या वापरांत 0.39 टक्क्यांनी वाड जाल्या. एका वर्सांत गोंयांत घरगुती आनी शेतकी मळा खातीर उदकाचो वापर वाडला. 2024 वर्सा गोंयांत उपयुक्त आनी उपलब्ध भूंय जल सांठ्यां मदीं 22.91 टक्के उदकाचो वापर केल्लो. 2025 वर्सा वापरपा सारक्या योग्य अश्या भूंय जल सांठ्याच्या 23.3 टक्के वापरलो. अशें आसलें तरी गोंयांतल्या सगल्या म्हालांतल्या भूंय जल सांठ्याचो वापर सुरक्षीत आसा. केंद्रीय भूंय जल मंडळाच्या अहवालांतल्यान ही म्हायती मेळ्ळी.
अहवाला प्रमाण 2024त गोंयांतले जमनींत 38 कोटी घन मिटर उदक जिरलें. हातूंतलें 31 कोटी घन मिटर उदक वापरपाक योग्य आशिल्लें. हातूंतलें 7 कोटी वापरलें. 2025त गोंयांतले जमनींत 38 कोटी घन मिटर उदक जिरलें. हातूंतलें 30 कोटी घन मिटर उदक वापरपा सारकें आशिल्लें. हातूंतलें 7 कोटी वापरलें. 2025त वापरिल्ल्या वट्ट भूंय जला पैकीं घरगुती वापरा खातीर सगल्यांत चड 4 कोटी घन मिटर उदक उपशिलें. जाल्यार शेतां खातीर 3 कोटी वापरलें. 2025त 89 टक्के भूंय जल सांठो हो मॉन्सून पूर्व आनी मॉन्सून उत्तर पावसाक लागून भरून गेलो.
2025त गोंया सयत हेर 11 राज्यांनी भूंय जलाचो सांठो 0.1 ते 0.2 मिटर मेरेन वाडला. पुराय देशाचो विचार करीत जाल्यार 2025त जमनींत सुमार 44 हजार 852 कोटी घन मिटर उदक जिरलें. हातूंतलें 54 टक्के उदक मॉन्सून काळांत जिरिल्लें. 20 टक्के हेर कारणांक लागून जाल्यार 19 टक्के उदक हें मॉन्सून काळांतल्या पावसा बगर हेर कारणांक लागून जमनींत मुरिल्लें. हातूंतलें 40 हजार 775 कोटी घन मिटर उदक वापरपा सारकें आशिल्लें. ह्या वर्सा देशांतल्या उपेगी उदका सांठ्या पैकीं 60.63 टक्के उदक वापरलें.
गोंयच्या मॉन्सून पूर्व भूंय जल पातळेंत उणाव
अहवाला प्रमाण 2025त गोंयच्या भूंय जल पातळेंत वाड जाल्ली आसली तरी 2014 ते 2024 ह्या धा वर्साचे तुळेन 2025त मॉन्सून पूर्व काळांतल्या राज्यांतली भूंय जल पातळी 0 ते 2 मिटरान उणीं जाल्या. अशें आसलें तरी वयल्या काळांत गोंयांतल्या चडश्या वाठारांनी मॉन्सून उत्तर काळांत उदकाची पातळी वाडिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
