भांगरभूंय | प्रतिनिधी
काणकोण म्हालांत सगल्यांत चड; 1 हजार अर्ज भायरायले
पणजीः गोंयांत रानां हक्क दावो घेवपा खातीर केल्ले सुमार 7 हजार अर्ज अजून मेरेन प्रलंबीत आसात. सगल्यांत चड अर्ज काणकोण म्हालांत प्रलंबीत आसात. जाल्यार दावे करपी 1 हजार अर्ज भायरायल्यात अशी म्हायती आदिवासी कल्याण खात्यान दिल्या.
खात्यान हे विशीं म्हायती दितना सांगलें, रानां हक्क कायदो 2006 खाला स्थापन केल्ली रानां हक्क समितीक हे अर्ज स्विकारपाचे अधिकार दिल्यात. ह्या कायद्या खाला अर्ज स्विकारपा खातीर कसलीच निमाण्या मुजतीच्या कलमाचो आस्पाव करूंक ना.
आतां मेरेन रानां हक्क दाव्यां खातीर 10,346 अर्ज आयल्यात तातूंतले 2398 अर्ज मान्य जाल्यात. जाल्यार 1039 अर्ज भायरायल्यात आनी तीग जाणांनी अर्ज फाटी घेतल्यात. जाल्यार 6906 अर्ज अजून मेरेन प्रलंबीत आसात. अर्ज फाटीं घेवपी तिगूय जाण हे सत्तरी म्हालांतले आसात.
रानां हक्क कायदो फक्त रानां सुवातीं खातीरच आसा हातूंत महसूल सुवातीच्या दाव्यांक कसलीच मान्यताय मेळना. पूण हालींच सर्वोच्च न्यायालयान दिल्ल्या आदेशा प्रमाण अवर्गीकृत रानां वाठार महसूल खात्या कडल्यान रानां खात्याक हस्तांतरीत करपा विशींच्या प्रस्तावाचेर सरकार विचार करता. हस्तांतरण प्रक्रिया जाले उपरांत हो वाठार सराकरी रानां वाठार म्हूण अधिसुचीत जातलो.
अनुसुचीत जमात आनी हेर परंपरीक रानांत रावपी लोक कायदो 2006 तरतुदी प्रमाण रानांत रावपी अनुसुचीत जमाती वा परंपारीक रानांत रावपी लोकांच्या वांगड्यांक मान्यताय मेळसर आनी पडटाळणी प्रक्रिया पुराय जायसर तांकां रानांल्यात भायर काडपाक शकनात.
म्हाल – वट्ट अर्ज – मान्य जाल्ले अर्ज – भायरायिल्ले अर्ज – प्रलंबीत अर्ज
सत्तरी 2482 614 375 1490
काणकोण 2555 495 23 2037
केपें 1840 231 242 1367
सांगें 1375 265 218 892
धारबांदोडें 1834 728 152 954
फोंडें 260 65 29 166
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
