भांगरभूंय | प्रतिनिधी
पाकिस्तानी नागरीक आशिल्ल्या मूळ गोंयकाराचो अर्ज मंजूर
भांगरभूंय । प्रतिनिधी
पणजीः पाकिस्तानी नागरीक आशिल्ल्या मूळ गोंयकार क्रिस्तांव व्यक्तीन सीएए खाला भारतीय नागरिकत्व मेळोवपा खातीर केल्लो अर्ज सरकारान मंजूर केला. बुधवारा सीएए खाला मुख्यमंत्री डॉ. प्रमोद सावंत हांचे हस्तुकीं कांसावलेचे जोसेफ फ्रान्सीस परेरा हांकां भारतीय नागरिकत्व प्रमाणपत्र दिलें. गोंयांत सीएए खाला दिल्लें हें पयलें नागरिकत्व.
मेळिल्ले म्हायती प्रमाण, जोसेफ फ्रान्सीस परेरा पुर्तुगेज काळांत गोंयांत जल्मल्लो. गोंय मुक्त जावचे पयलीं तो पाकिस्तानांत स्थलांतरीत जालो. उपरांत ताणें गोंयचे एके बायले कडेन लग्न केलें आनी परतून गोंयांत आयलो. सध्या तो घरकान्नी वांगडा कासावले रावता. कांय काळा पयलीं ताणें भारतीय नागरिकत्व मेळोवपा खातीर ऑनलायन अर्ज केल्लो. ताणें सादर केल्ल्या सगळ्या कागदपत्रांची तपासणी चार वांगड्यांची समितीन केल्ली. ते उपरांत समितीन केंद्रीय गृह मंत्रालयाक हे व्यक्तीक भारतीय नागरिकत्व परतून मेळोवन दिवपाची शिफारस केली. सगळी प्रक्रिया पुराय जाले उपरांत बुधवारा ताका मुख्यमंत्री हस्तुकीं भारतीय नागरिकत्व दिलें. भारतीय नागरिकत्व मेळ्ळें उपरांत जोसेफ फ्रान्सीस परेरा हांणी सांगलें, आपूण फाटलीं 11 वर्सां भारतीय नागरिकत्व मेळोवपाचो यत्न करतालों. तातूंत जायत्यो अडचणी आयल्यो. पूण अखेरेक प्रधानमंत्री नरेंद्र मोदी आनी गृहमंत्री अमीत शहा हांकां लागून आपलें सपन साकार जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
