भांगरभूंय | प्रतिनिधी
5 वर्सांत 400 टक्क्यां परस चड वाड
पणजी: पांच वर्सांत गोंयांतल्या सायबर गुन्यांवांनी वाड जाल्या. केंद्र सरकाराच्या राष्ट्रीय सायबर गुन्यांवगारी रिपोर्टींग पोर्टलाचेर 2019 वर्सा सायबर गुन्यांवां विशीं 15 कागाळी दाखल जाल्ल्यो. 2023 अखेरेक तातूंत वाड जावन त्यो 86 जाल्यो. पांच वर्सांत सायबर गुन्यांवांचे कागाळींत 473.33 टक्क्यांनी वाड जाल्या. लोकसभेंतल्या प्रस्नाचे जापेंतल्यान ही म्हायती मेळ्ळी.
जापेंत दिल्ले म्हायती प्रमाण, गोंयांतल्यान सायबर गुन्यांवगारी रिपोर्टींग पोर्टलाचेर 2020त 40, 2021त 36 जाल्यार 2022त 90 कागाळी दाखल जाल्ल्यो. हातूंतल्यो चडश्यो कागाळी सायबर फटवणुकेच्यो आशिल्ल्यो. राष्ट्रीय पोर्टल सुरू जावचे पयलीं 2015त गोंयांत सायबर गुन्यांवां विशीं 17 कागाळी दाखल जाल्ल्यो. 2016त 31, 2017त 13 जाल्यार 2018त 29 कागाळी दाखल जाल्ल्यो.
पुराय देशाचो विचार करीत जाल्यार 2019 ते 2023 मजगतीं 3 लाखां परस चड कागाळी पोर्टलाचेर नोंद जाल्ल्यो. हातूंतल्यो सगल्यांत चड 60 हजार कागाळी फक्त कर्नाटकांतल्यान आयिल्ल्यो. जाल्यार उत्तर प्रदेश, महाराष्ट्र, तलंगणां सावन आयिल्ल्या कागाळींची संख्या लेगीत चड आशिल्ली. वयल्या काळांत नागालॅण्ड सावन सगल्यांत उण्यो म्हणल्यार 24 कागाळी दाखल जाल्ल्यो. मणिपूर, मिझोराम, त्रिपुरा सावन कागाळीचें प्रमाण उणें आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
