भांगरभूंय | प्रतिनिधी
-राष्ट्रीय गुन्यांव नोंदणी ब्युरोच्या अहवालांतल्यान स्पश्ट
पणजी : डिजिटल युगांत इंटरनेटच्या वाडट्या वापरा सयत सायबर गुन्यांव लेगीत वाडत आसात. गोंयांत एका वर्सांत सायबर गुन्यांवांनी दुपेटीनी वाड जाल्या. हे विशीं हालींच राष्ट्रीय गुन्यांव नोंदणी ब्युरोन (एनसीआरबी) अहवाल जाहीर केला. गोंयांत 2020 त 40 सायबर गुन्यांव नोंद जाल्ले. 2021 त ते उणे जावन 36 जाले. पूण 2022 अखेर सायबर गुन्यांव वाडून 90 जाले, अशें राष्ट्रीय गुन्यांव नोंदणी अहवालांत नमूद केलां.
अहवाला प्रमाण, डिसेंबर 2022 अखेरेक राज्यांतल्या सायबर गुन्यांवांचें प्रमाण 5.7 टक्के आशिल्ले. जाल्यार पुलिसां वरवीं अशा गुन्यांवांनी चार्जशीट दाखल करपाचें प्रमाण फक्त 37.5 टक्के आशिल्ले. 2022 त फटवणुकीचे 17, सायबर वरवीं दादागिरी करून बायलांक त्रास दिवप 1, संगणका कडेन संबंदीत हेर गुन्यांव 13, ल्हान भुरग्यांचे वा हेर अश्लील व्हिडियो आनी फोटो प्रसिद्ध करपा संबंदी 4 जाल्यार ऑनलायन जुगार विरोधांत दोन गुन्यांवांची नोंद जाल्या.
2022 त नोंद जाल्ल्या 90 सायबर गुन्यांवां मदीं सगल्यांत चड 65 गुन्यांवां फाटलो उद्देश फटवणूक करप होच आशिल्लो. जाल्यार राजकी उद्देश, वैयक्तीक सूड घेवप आनी ऑनलायन माध्यमांतल्यान खंडणी मागप ह्या कारणां खातीर दरेकी एका गुन्यांवाची नोंद जाल्या.
पुलिसांनी 2021 तले प्रलंबीत 52 आनी 2022 च्या 90 अशा वट्ट 142 प्रकरणांत तपास केला. पुलिसांनी 40 प्रकरणां निकालांत काडली, जाल्यार 2022 चे अखेरेक वट्ट 102 प्रकरणांत तपास पुराय जावंक नाशिल्लो. पुलिसां कडल्यान प्रकरणां प्रलंबीत रावपाची टक्केवारी 71.8 टक्के इतली आशिल्ली.
न्यायालयांत 2021 तले 65 खटले प्रलंबीत अाशिल्ले, जाल्यार 2022 तले 15 मेळून वट्ट 80 खटले प्रलंबीत अाशिल्ले.
‘अायडेंटीटी थेफ्ट’चे 9 गुन्यांव नोंद
डिसेंबर 2022 अखेरेक गोंयांत आयडेंटीटी थेफ्ट चे 9 गुन्यांव नोंद जाल्ले. फाटल्या कांय वर्सांत दुसऱ्याची डिजिटल वळख चोरून म्हणल्यार ‘आयडेंटीटी थेफ्ट’ चे गुन्यांव वाडत आसात. हातूंत गुन्यांवकार सोशल मिडिया वा हेर डिजिटल प्लॅटफॉर्माचेर दुसऱ्याच्या नांवान अकावंट उक्तें करून गुन्यांव करतात. हे वरवीं विशेश करून बायलांक बदनाम करपाचो हेत अासता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
