भांगरभूंय | प्रतिनिधी
जीटीडीसीची एनएफएसयू कडेन सामंजस्य कबलात
पणजीः सायबर कमांडो प्रशिक्षण कार्यावळी खातीर जीटीडीसीच्या फार्मागुडी रेसिडेन्सी युनिटाचो वापर करपाच्या हेतान पणजी गोंय पर्यटन उदरगत म्हामंडळान (जीटीडीसी) राष्ट्रीय फॉरेन्सिक विज्ञान विद्यापिठा कडेन म्हत्वाची सामंजस्य कबलात (एमओयू) मंजूर केला.
पणजेंतल्या एनएफएसयूचे संचालक प्रा. नवीन कुमार चौधरी आनी जीटीडीसीचे महावेवस्थापक (मार्केटिंग) हॉटेल्स गॅविन डायस हांणी ह्या एमओयूची औपचारीक तरेन अंमलबजावणी केल्या. ह्या सुवाळ्याक जीटीडीसीचे उपमहावेवस्थापक (मार्केटिंग) दीपक नार्वेकार आनी एनएफएसयूचे उपनिबंधक सुंदर लाल शर्मा हाजीर आशिल्ले.
हाचे उपरांत एनएफएसयूचे उपनिबंधक सुंदर लाल शर्मा हांणी पर्यटन भवनांत जीटीडीसीचे अध्यक्ष डॉ. गणेश गांवकार हांकां मेळून सामंजस्य कबलाती विशीं म्हायती दिली. जीटीडीसीचे वेवस्थापकीय संचालक कुलदीप आरोलकार, जीटीडीसीचे वरिश्ठ वेवस्थापक विशेश नायक आनी एनएफएसयू गोंय कॅम्पस अकादेमीचे सहाय्यक प्राध्यापक आनी डीन डॉ. लोकेश लोकेश चौहान ह्या वेळार हाजीर आशिल्ले.
ही भागीदारी गोंयच्या दर्यावेळे भायर पर्यटनाक चालना दिवपाचे यत्न घटमूट करतली, तेच बरोबर राज्याची सायबर सुरक्षा क्षमता वाडोवपा खातीर प्रगत प्रशिक्षण कार्यावळी आयोजीत करपा खातीर एनएफएसयूच्या तज्ञतेचोय फायदो घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
