भांगरभूंय | प्रतिनिधी
पणजी : केंद्र सरकारान कांय म्हयन्यां आदीं सहकारी टॅक्सीची घोशणा केल्ली. हेच फाटभूंयेर गोंयांत सहकारी तत्त्वाचेर टॅक्सी सेवा सुरू करपा विशीं विचार सुरू आशिल्ल्याचें सहकार प्रबंधक आशुतोष आपटे हांणी सांगलें. बिरेस्तारा गोवा चेंबर ऑफ कॉमर्साचे कार्यावळींत ते उलयताले. ह्या वेळार नाबार्डचे संदीप धारकार, जीसीसीआयची अध्यक्ष प्रतिमा धोंड, आरबीआयचे क्षेत्रीय संचालक प्रभाकर झा आनी पीएचडी सीसीआयचे डॉ. जतींदर सिंग हजर आशिल्ले.
आपटे हांणी सांगलें, केंद्रीय सहकार खात्यान विवीध ५४ मळांचेर सहकारी संस्था वाडोवपाची शक्यताय तपासपाक सांगलां. ते प्रमाण आमी गोंयांत पर्यटन मळार सहकार वाडोवपाचो यत्न करतात. हे प्रमाण गोंयांत सहकारी तत्त्वाचेर टॅक्सी सेवा सुरू करपाक मेळटली काय? हाचेरूय विचार चल्ला. हे विशीं आमी आनीक अभ्यास करून शक्यताय आसल्यार फुडलीं पावलां उबारतले. अशा उपक्रमांची गरज आसल्यार नाबार्ड तशेंच खात्या वतीन अर्थीक मजतूय दितले. सहकारी टॅक्सी सुरू जाल्यार ताचो थळाव्यां सयत पर्यटकांकूय फायदो जावपाक शकता.
राज्यांत सुमार ५५०० सहकारी संस्थांची नोंदणी आसा. अपवाद सोडल्यार चडश्यो सहकारी संस्था हो एकेच तरेचो वेवसाय करतात. ह्या संस्थांक एका परस चड वेवसाय करपाक मेळटलो हे खातीर खातें यत्न करता. आयटी मळार नव्या तंत्रज्ञानाचो वापर करून सहकार मळाक घटमूट करपाचो यत्न करतात. राज्यांत सहकार मळ वाडपा खातीर वाव आसा. केंद्रीय सहकारी विद्यापीठाचे गोवा कॅम्पस सुरू जाल्यार विद्यार्थ्यांक फायदो जातलो.
डिसेंबर २०२५चे निमाणे कडेन दरेका पंचायत मळार उण्यात उणी एक तरी सहकारी संस्था स्थापन करपाचें खात्याचें लक्ष्य आसा, अशें तांणी मुखार सांगलें.
मिठागरांच्या पुनरुज्जीवना खातीर यत्न
आपटे हांणी म्हणलें, फाटल्या कांय वर्सांनी गोंयच्या मिठागरांचो आंकडो उणो जाता. आमी खात्या वतीन मिठागरांचें पुनरुज्जीवना खातीर यत्न करतले. सहकारी तत्वाचेर मिठागरां चलोवपा विशीं विचार करप सुरू आसा. फार्मा कंपनींक लागपी वखदी वनस्पतींचें उत्पादन वाडोवपा विशींय यत्न चल्ल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
