भांगरभूंय | प्रतिनिधी
नामनेचो रेंव कलाकार आनी पद्मश्री सुदर्शन पटनायक हांणी काल मिरामार दर्यादेगेर, भारताच्या 55 व्या आंतरराष्ट्रीय चित्रपट महोत्सवाच्या उत्सवाचो एक भाग म्हूण, एक अदभूत रेंव कला शिल्प उबारलें. भारतीय सिनेमा आनी संगीतांतलया चार व्यक्तींक समर्पीत केल्ल्या रेंव शिल्पाचें गोंयचें मुख्यमंत्री डॉ. प्रमोद सावंत हांणी उक्तावण केलें.
डॉ. प्रमोद सावंत, हांणी भारतीय सिनेमाच्या चार सृजनशील आनी कलात्मक व्यक्तीक मान दिल्ले खातीर एनएफडीसी आनी श्री सुदर्शन पटनायक हांचे उपकार मानले. मीरामार दर्यादेगेर तयार केल्ल्या रेंव शिल्पां मदले हे एक व्हडलें शिल्प, आनी ह्या व्हड व्यक्तींच्या दायजाची ही एक सोबीत गवाय म्हणून उबी आसा. पटनायक आनी पुराय पंगडाक तांणी केल्ल्या उल्लेखनीय यत्नांक लागून हांव परबीं दितां अशें तांणी सांगलें.
मिरामार दर्यादेगेर सोबीत वाठारात तयार केल्ली ही रचना चार अमर योगदानाक आर्गां ओंपता. ह्या दर एका व्यक्तीन भारतीय चित्रपट आनी संगीत उद्देगाक आकार दिलो आनी हें रेंव शिल्प तांच्या प्रभावाक आर्गां ओंपता.
ही कलाकृती पुराय करपाक पुराय दोन दीस लागले. एक दीस तयारी खातीर आनी दुसरो दीस कलात्मक कामा खातीर. रेंव कलेंतल्या आद्य योगदाना खातीर संवसारीक पांवड्यार मान्यताय मेळिल्लो, आपल्या कलाकुसरीचो वापर करून वेगवेगळ्या समाजीक आनी पर्यावरणीय प्रस्नांचेर जागृताय करपाक, आपल्या वावरांतल्यान शांतताय, एकचाराक चालना दिवपी म्हूण पटनायक हांकां वळखतात. हांवें म्हजें रेंव शिल्प हाचे आदीं कानांत सादर केलां. पूण इफ्फींत म्हाका पयलेच खेपे आपयलां अशें तांणी सांगलें.
रेंव कलेचें म्हत्व सांगतना सुदर्शन पटनायक हांणी गोंय रेंव शिल्प प्रशिक्षणाचें केंद्र जावपाची तांक दवरता अशें सांगलें. सोबीत दर्यादेगो आशिल्ल्यान गोंयांत एक समर्पीत रेंव कला प्रशिक्षण संस्था आसपाक जाय, जंय थळाव्या कलाकारांक आनी विद्यार्थ्यांक रेंव शिल्पाची कलाकारी शिकपाक मेळटली. राज्याच्या सांस्कृतीक दृश्टीकोनांत ही एक व्हडली भर पडटली आनी गोंयांतल्यान येवपी संवसारभरांतल्या पर्यटकांक एक अद्भुत भेट थारतली. अशें तांणी सांगलें.
गोंय आनी आपलें मूळ राज्य ओडिशा हांगाच्या खाशेल्या दर्यादेगे वयल्या वाठारांचेर चिंतन करतना पट्टनायक हांणी वेगवेगळ्या दर्यादेगांचेर मेळपी वेगवेगळ्या प्रकारच्या रेंवें विशी म्हायती दिली. “दर एका दर्यादेगेक आपलें खाशेलें स्वरूप आनी रेंवचो प्रकार आसता. पूण कलाकारा खातीर सगळी रेंव सारकीच अशें तांणी सांगलें.
पटनायक हाच्या ह्या वावराक लागून ताका संवसारभर तोखणाय मेळ्ळ्या. ताणें भारताचें प्रतिनिधित्व जायत्या आंतरराष्ट्रीय रेंव कला महोत्सवांनी, तातूंत प्रतिश्ठीत कान्स चित्रपट महोत्सवाचो आस्पाव केला. इफ्फींत ताणें केल्लो वावर भारतीय सिनेमाक आनीक महोत्सवाच्या गिरेस्त सांस्कृतीक परंपरेत एक उल्लेखनीय भर घालपी थारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
