भांगरभूंय | प्रतिनिधी
जानेवारी 2017 सावन मार्च 2023 मेरेनची आंकडेवारी
भांगरभूंय । अजय लाड
मडगांवः गोंयांत अपघातांत जखमी तशेंच हेडपी गोरवांक शेल्टर होमांत दाखल करतात. फाटल्या सात वर्सांतली (मार्च 2023 मेरेन) आंकडेवारी पळयत जाल्यार वट्ट 9421 जनावरांक धरून शेल्टर होमांत दाखल केल्लीं. तातूंतलीं 4227 जनावरां विवीध कारणांक लागून मेलीं. आंकडेवारीची पडताळणी करीत जाल्यार शेल्टर होमांत दाखल केल्ल्या 44 टक्के जनावरांक मरण आयिल्ल्याचें दिसता.
गोंयांत हेडग्या गोरवांचो प्रस्न गंभीर जाला. गोरवां सांबाळ मंत्री नीळकंठ हळर्णकार हांणी विधानसभेंत दिल्ले म्हायती प्रमाण 2017 सावन मार्च 2023 मेरेन शेल्टर होमांत 9421 गोरवांक दाखल केल्लीं आनी तातूंतल्या 4227 गोरवांक मरण आयलां. प्लास्टीक खाल्ल्यान अपचन जावन तांकां मरण आयिल्ल्याचेंय मंत्र्यान विधानसभेंत दिल्ले म्हायतींत म्हणलां.
गोंयांतल्या गोमंतक गोसेवक म्हासंघा कडल्या हेडग्या गोरवांची स्थिती पळयत जाल्यार 2017 ते 2022 मेरेन 3687 गोरवां शेल्टर होमांत हाडिल्लीं आनी तातूंतल्या 1006 गोरवांक मरण आयिल्लें. जानेवारी ते मार्च 2023 मेरेन 885 गोरवांक दाखल केलीं आनी तातूंतल्या 273 गोरवांक मरण आयलां.
ध्यान फावंडेशन संस्थेच्या शेल्टर होमांत 2017 ते 2022 मेरेन 3295 गोरवांक हाडिल्लीं. तातूंतल्या 2235 गोरवांक मरण आयलां.
फावंडेशना कडल्यान मेळिल्ले म्हायती प्रमाण संस्थे कडल्यान अपघातांत जखमी गोरवांक हाडिल्लीं. चडश्या गोरवांक फाटीचो कणो मोडिल्ल्यान मरण आयलां.
अखील विश्व जय श्रीराम गोसंवर्धन केंद्रांत 2022 त 740 गोरवांक दाखल केल्लीं. तातूंतल्या 206 गोरवांक मरण आयलें. जाल्यार जानेवारी ते मार्च 2023 मेरेन 68 गोरवांक दाखल केल्लीं, तातूंतल्या 32 गोरवांक मरण आयलें. गोमंतक गोसेवक म्हासंघा कडेन 2017 ते मार्च 2023 मेरेन 4572 गोरवांक हाडिल्लीं आनी तातूंतलीं 1279 गोरवां मेलीं. हें प्रमाण 27.97 टक्के आसा. ध्यान फावंडेशना कडेन 4041 गोरवां हाडिल्लीं, तातूंतलीं 2710 गोरवां मेलीं. ही टक्केवारी 67.06 टक्के इतलीं आसा. ते भायर अखील विश्व जय श्रीरम गोसंवर्धन केंद्रांत 808 गोरवांक दाखल केल्लीं, तातूतंतलीं 238 गोरवां मेलीं. ही आंकडेवारी 29.45 टक्के इतली आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
