गोंयांत शॅर बाजारांतल्या गुंतवणुकदारांत फाटल्या पांच वर्सांत दुपेटीन वाड

भांगरभूंय | प्रतिनिधी

-देशभरांत गुंवणूकदारांची संख्या 6 कोटी वाडल्या पणजीः फाटल्या कांय वर्सांत शॅर बाजार आनी म्युच्युअल फंडांत पयशे गुंतवणुकीचे लोकप्रिय पर्याय जावपाक लागल्यात. बचत खातें, स्थीर ठेव अशा परंपरीक गुंतवणूक पर्यायां परस लोकांक शॅर बाजारांतल्यान बरो परतावो मेळपाक लागला. देशभरांत फाटल्या पांच अर्थीक वर्सांत शॅर बाजारांत गुंतवणूकदारांची संख्या सुमार 6 कोटी वाडल्या. मजगतीं, गोंयांत गुंतवणूकदारांची संख्या दुपेटी परस चड वाडल्या. ही म्हायती राष्ट्रीय स्टॉक एक्सचेंजान हालींच जाहीर केल्ल्या अहवालांत दिल्या.

2020-21 वित्तीय वर्सा गोंयच्या शॅर बाजारांत 1 लाख 4 हजार लोकांनी गुंतवणूक केल्या. 2024-25 वर्सा (30 नोव्हेंबराच्या निमाणे) ती वाडून 2 लाख 36 हजार जाल्या. हाचे भायर गोंयांत 2021-22 वर्सा 1 लाख 43 हजार लोकांनी शॅर बाजारांत, 2022-23 वर्सा 1 लाख 69 हजार आनी 2023-24 वर्साच्या निमाणे मेरेन 1 लाख 93 हजार लोकांनी शॅर बाजारांत गुंतवणूक केल्या अशें अहवालांत नमूद केलां.

मेळिल्ले म्हायती प्रमाण, गोंयच्या शॅर बाजारांत 2009-10 ते 2019-20 ह्या अर्थीक वर्साच्या धा वर्सांत फकत 52 हजारांनी गुंतवणूकदारांची वाड जाल्या. पूण 2020-21 वित्तीय वर्सा उपरांत ती नेटान वाडली. ल्हान राज्यांतल्या शॅर बाजारांत आनी म्युच्युअल फंडांत गुंतवणूक करपाक गोंयकार मुखार आसात. तशेंच हेर राज्यांचे तुळेंत शॅर बाजारांतल्या गुंतवणुकींत बायलांची टक्केवारी गोंयांत चड आसा.

नोव्हेंबर 2024 च्या निमाणे मेरेन 10.7 कोटी लोकांनी शॅर बाजारांत गुंतवणूक केल्या. हातूंतले 1.70 कोटी लोक चडशे महाराष्ट्रांतले आसात. ताचे उपरांत उत्तर प्रदेश (1.2 कोटी), गुजरात (94 लाख), अस्तंत बंगाल (62 लाख), राजस्थान (61 लाख), कर्नाटक (59 लाख). देशांत सगळ्यांत उण्या प्रमाणांत गुंतवणूकदारांची संख्या मिझोरामांत 24 हजार आसा. केंद्रीय प्रदेशां मदीं दिल्लींत सगळ्यांत चड 4.7 लाख लोकांनी शॅर बाजारांत गुंतवणूक केल्या.

गोंयांतल्या 16 टक्के लोकांची शॅर बाजारांत गुंतवणूक

अहवालांत दिल्ले म्हायती प्रमाण, 30 नोव्हेंबर 2024 मेरेन गोंयांत 2 लाख 36 हजार लोकांनी शॅर बाजारांत गुंतवणूक केल्या. हाचो अर्थ लोकसंख्येचे तुळेंत गोंयांतल्या 15.73 टक्के लोकांनी शॅर बाजारांत गुंतवणूक केल्या.