भांगरभूंय | प्रतिनिधी
भांगरभूंय । प्रतिनिधी
पणजीः केनियांतल्या तरणाट्या चलयांक गोंयांत हॉटेल वेवसायांत नोकरेक लावपाचे हांयस दाखोवन तांकां शिंदळखी वेवसाय करपाक फोर्सार करपी टोळयेचो हणजूण पुलिसांनी 2023 वर्सा सप्टेंबर म्हयन्यांत पर्दाफाश केल्लो. ह्या प्रकरणांत हवाला आनी मनी लाँड्रिगाचे पुरावे सामकार आयिल्ल्यान सक्त वसुली संचालनालयान (ईडी) चार केनियन नागरिकां आड पणजेच्या विशेश न्यायालयांत सुमार 3,700 पानाचें आरोपपत्र सादर केलां. तातूंत 16 साक्षिदारांची नांवा दिल्यात.
ह्या प्रकरणांत हणजूण पुलिसांनी एका पिडेस्त केनियन बायलेच्या कागाळेची दखल घेवन 8 सप्टेंबर 2023 दिसा गुन्यांव नोंद केल्लो. तातूंत ताणी मारिया डोर्कास उर्फ इस्त्रालीट आनी विल्किस्टा आचिस्टा ह्या केनियन बायल पिंपांक अटक केल्ली. शिवाय मुखेल दुबावीत आल्नपा आनी चार्ल्स एहून ह्या नायजेरियनाक हणजूण पुलिसांनी बंगळुरूच्यान अटक केल्ली. त्या वेळार पुलिसांनी सांत बायलांची सुटका केल्ली.
इडीन ह्या प्रकरणात हवाल आनी मनी लाँड्रिगाच्या दुबावान चवकशी सुरु केल्ली. 9 डिसेंबर 2023दिसा केनियांत वचपाचे तयारेत आशिल्ल्या न्यूटन मुथुरी किमानी ह्या केनियन नागरिकाक दिल्ली विमानतळार अटक केल्ली. चवकशे वेळार ताणे मारिया आनी विल्किस्ट व्हो गोयांत पिंप म्हणून काम करपी बायलांनी शिंदळकी वेवसायांतल्यान मेळपी पशये हाताळपाचें काम ताका दिल्लें अशी म्हायती दिल्ली. आपूण आनी हेलन जेम्स किमारो पयशे विदेंशांत धाडटात अशें ताणे सांगल्लें. चवकशी पुराय जाल्या उपरांत ईडीन विशेश न्यायालयांत आरोपपत्र दाखल केलां. फुडली सुनावणी 6 मार्चाक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
