भांगरभूंय | प्रतिनिधी
11 म्हयन्यांत 9 हजार कोटींची वाड
भांगरभूंय । पिनाक कल्लोळी
पणजीः फाटल्या कांय वर्सांत गोंया सयत पुराय देशांत पयशे गुंतोवपाक म्युच्युअल फंड हो पर्याय लोकप्रीय जाता. नोव्हेंबर 2023 चे अखेर मेरेन गोंयांतल्या म्युच्युअल फंडांत 28 हजार 490 कोटी रुपयांची गुंतवणूक केल्ली. ऑक्टोबर 2024 अखेर मेरेन तातूंत 9410 कोटी रुपयांची वाड जावन ती 37 हजार 900 कोटी रुपया जाल्या. तातूंत 8 विवीध तरेच्या म्युच्युअल फंड येवजण्यांचो आस्पाव आसा.
असोसिएशन ऑफ म्युच्युअल फंड इन इंडिया (एएमएफआय) हे संस्थेच्या अहवाला प्रमाण गोंयांतल्या म्युच्युअल फंडांतली दर व्यक्ती गुंतवणूक देशांत सगळ्यांत चड आसा. नोव्हेंबर 2023 अखेर मेरेन गोंयांत दर व्यक्ती 1 लाख 89 हजार 935 रुपया म्युच्युअल फंडांत गुंतयल्ले. ऑक्टोबर 2024 अखेरेक तातूंत वाड जावन दर व्यक्ती गुंतवणूक 2 लाख 43 हजार 80 रुपया जाल्या.
हे वळेरेंत महाराष्ट्र दुसरे सुवातेर आसा. थंयच्यान दर व्यक्ती 2 लाख 24 हजार 150 रुपया म्युच्युअल फंडांत गुंतयल्यात. केंद्रशासीत प्रदेशांचो विचार केलो जाल्यार दिल्लीची दर व्यक्ती म्युच्युअल गुंतवणूक सगळ्यांत चड म्हणल्यार 2 लाख 68 हजार 680 रुपया आसा.
अहवाला प्रमाण ऑक्टोबर 2024 अखेर मेरेनचे आंकडेवारी प्रमाण गोंयांतले वट्ट गुंतवणुके मदीं सगळ्यांत चड 82 टक्के म्हणल्यार 31 हजार 78 कोटी रुपया एक्विटी येवजणेंत गुंतयल्यात. 4 हजार 927 कोटी डेबीट ओरियेंटेड येवजणेंत, 1 हजार 137 कोटी लिक्वीड येवजणेंत जाल्यार सुमार 6 हजार कोटी रुपया हेर येवजण्यांनी गुंतयल्यात. पुराय देशाचो विचार केलो जाल्यार ऑक्टोबर 2024 अखेरेक म्युच्युअल फंडांत सुमार 67 लाख कोटी रुपयांची गुंतवणूक केल्या.
गोंयांतल्यान म्युच्युअल फंडांत केल्ली गुंतवणूक
वर्स गुंतवणूक (कोटी रुपया)
नोव्हेंबर 2019 – 17 हजार 13
नोव्हेंबर 2020 – 17 हजार 119
नोव्हेंबर 2021 – 22 हजार 284
नोव्हेंबर 2022 – 23 हजार 818
नोव्हेंबर 2023 – 28 हजार 490
ऑक्टोबर 2024 – 37 हजार 900
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
