भांगरभूंय | प्रतिनिधी
मुख्यमंत्र्यान उक्तायलो हुस्को : सांखळे मानेस्तांचो सत्कार
भांगरभूंय । प्रतिनिधी
सांखळी : गोंयांत दिसान दीस किडनी डायलिसिसाचे दुयेंती वाडटात. आदीं फक्त बांबोळेच्या जीएमसींतूच किडनी डायलिसिस केंद्र आशिल्लें. पूण आयज गोंयांतल्या दरेका म्हालांत डायलिसिस केंद्र सुरू करपाचो वेळ सरकाराचेर आयला. हाचोच अर्थ गोंयांतल्या लोकांची भलायकी दिसान दीस इबाडत चल्ल्या, हें स्पश्ट जाता. हाचेर भौशीक गणेशोत्सव मंडळांनी गोडेमूत आनी हेर दुयेंसांचेर मार्गदर्शन करचें. तशेंच गोंयांतले विद्यार्थी स्पर्धात्मक परिक्षांत समाधानकारक कामगिरी करपाक शकानाशिल्ल्यान खूबश्या मळांचेर फाटीं उरतात. ह्या विद्यार्थ्यांक अश्या स्पर्धात्मक परिक्षां खातीर तयार करपाचो वावर भौशीक गणेशोत्सव मंडळांनी केल्यार फुडारांत विकसीत गोंय प्रत्यक्षांत येवपाक ताची मजत जातली, अशें मुख्यमंत्री डॉ. प्रमोद सावंत हांणी सांगलें.
सांखळी सार्वजनीक गणेशोत्सव मंडळा वतीन आयोजीत केल्लो सत्कार सुवाळो आनी इनानां भेटोवपाचे कार्यावळींत मुख्यमंत्री डॉ. सावंत उलयताले. ह्या वेळार माचयेर सांखळेची नगराध्यक्ष सिध्दी प्रभू, गणेशोत्सव मंडळाचे अध्यक्ष विनय पांगम, सचीव राधिका कामत सातोस्कार, केंद्रीय समितीचे अध्यक्ष उपेंद्र कर्पे, सचीव धीरेश पेडणेंकर, सत्कारमूर्ती ज्येश्ठ लेखक सदानंद काणेकर आनी हेर मानेस्त हाजीर आशिल्ले.
भौशीक गणेशोत्सव मंडळाची माची ही विवीध युवा आनी नव्या कलाकारांक मुख्य प्रवाहांत हाडटा. हे माचये वयल्यान विवीध कलेंतले कलाकार तयार जातनाच समाजीक मळार नेतृत्व करपी फुडारी लेगीत तयार जावपाक जाय. गोंयांतल्या गणेशोत्सव मंडळाचेर समाजांत जागरुकता करपाची व्हड जापसालदारकी आसा. ह्या मंडळांनी आयज लोकांक भलायकी आनी शिक्षणीक मळार प्रभावी जागरुकता आनी मार्गदर्शन करप गरजेचें आसा, अशें डॉ. सावंत हांणी सांगलें.
गोंयांत सध्या सायबर गुन्यांव वाडटात. आमच्या हातांतल्या मोबायल फोनाक लागून आमी केन्ना सायबर गुन्यांवांत घुस्पतले, हे कळचें लेगीत ना. ते खातीर मोबायल फोनाचो वापर करतना सगले तरेची जतनाय घेवप गरजेची आसा, अशें मुख्यमंत्र्यान सांगलें.
मुख्यमंत्र्यां हस्तुकीं लेखक सदानंद काणेकार हांचो सत्कार केलो. तशेंच तांचे वांगडा पुलीस उपअधिक्षक विश्वेश कर्पे, युवा कवयित्री रुसी परब हिचोय भोवमान केलो.
नगराध्यक्ष सिद्धी प्रभू हांणी सांगलें, सांखळी सार्वजनीक गणेशोत्सव मंडळाचे हे माचयेन आपल्या सारक्या कितल्याश्याच जाणांक आत्मविस्वास आनी समाजांत काम करपाची प्रेरणा दिली. अध्यक्ष विनय पांगम हांणी येवकार दिलो. राजेश वजरीकार आनी श्याम पेडणेंकार हांणी सुत्रसंचालन केलें. केंद्रीय समितीचे अध्यक्ष उपेंद्र कर्पे हांणी प्रास्तावीक केलें. सचीव धीरेश पेडणेंकार हांणी अहवाल सादर केलो. सचीव राधिका कामत सातोस्कार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
