भांगरभूंय | प्रतिनिधी
पणजी: सोमारा गोंयांत दीसभर वत पावसाचो खेळ सुरू आशिल्लो. अदीं मदीं पावसाची नेटाची दडक येताली. हवामान खात्यान आयज उण्या स्वरुपाच्या पावसाची शक्यताय उक्तायल्या. जाल्यार 1 ते 3 ऑक्टोबर मजगतीं मध्यम स्वरुपाच्या पावसाची शक्यताय उक्तावन तीन दिसां खातीर यलो अलर्ट जारी केला. गोंयांत 1 जून ते 29 सप्टेंबर मजगतीं सरासरी 123.02 इंच पावसाची नोंद जाल्या. अंदूं पावसाचें प्रमाण 4.2 टक्क्यांनी चड आसा.
गोंयांत 4 आनी 5 ऑक्टोबर दिसा मध्यम स्वरुपाच्या पावसाची शक्यताय आसा. 24 वरांत सरासरी 1.77 इंच पावसाची नोंद जाली. ह्या वेळार कोणकोणां 3.75 इंच, केप्यां 2.95 इंच, पेडण्यां 2.07 इंच जाल्यार मडगांवां 1.90 इंच पावसाची नोंद जाली. 30 सप्टेंबर ते 3 ऑक्टोबर मजगतीं, वाऱ्याचाे गती वराक 40 ते 65 किमि मेरेन पावपाची शक्यताय उक्तायल्या. वयल्या काळांत नुस्तेमारांनी दर्यांत वच्चे न्हय अशें आवाहन हवामान खात्यान केलां.
सोमारा पणजेंत चडांत चड 29.6 अंश आनी उण्यांत उणें 24 अंश सेल्सियस तापमानाची नोंद जाली. मुरगांवां चडांत चड तापमान 26.6 अंश आनी उण्यांत उणें तापमान 23.4 अंश सेल्सियस उरलें. फुडले स दीस गोंयांतलें चडांत चड तापमान 28 ते 30 अंश जाल्यार उण्यांत उणें तापमान 24 ते 25 अंश सेल्सियस मजगतीं उरपाची शक्यताय आसा.
धारबांदोड्यां 160 इंच पुराय
गोंयांत 1 जून ते 29 सप्टेंबर मजगतीं धारबांदोड्यां 160.83 इंच पावसाची नोंद जाली. ह्या वेळार सांग्यार 159.90 इंच, वाळपय 156.79 इंच, केप्यां 151.24 इंच, फोंड्यां 129.36 इंच, सांखळे 126.55 इंच जाल्यार पेडण्यां 121.87 इंच पावसाची नोंद जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
