भांगरभूंय | प्रतिनिधी
पणजी ः गोंयांत वक्फ बोर्ड वा अशा मंडळाची मालमत्ता ना. देखून संसदेंत मंजूर जाल्ल्या वक्फ मंडळ दुरुस्ती विधेयकाचो गोंयचेर कसलोच परिणाम जावचो ना. राज्यांतल्या हिंदू, मुसलमान, क्रिस्तांव आनी हेर सगळ्या धर्मीक लोकांनी बरेंपणान रावचें अशें आवाहन मुख्यमंत्री डॉ. प्रमोद सावंत हांणी केलें.
शुक्रारा पर्वरी मंत्रालयांत जाल्ले पत्रकार परिशदेंत ते उलयताले. वक्फ मंडळ फाटलीं कांय वर्सां देशभरांतल्या जायत्या सुवातींनी मालमत्तेचो दावो करता. देखूनच केंद्र सरकारान हे संबंदी कायद्यांत दुरुस्ती करपाचो निर्णय घेतलो. इतिहासांत पयलेच खेपे केंद्र सरकारान बायलांची वक्फ मंडळांत नेमणूक करपाचो निर्णय घेवन बायलांक न्याय मेळून दिलां. देखून केंद्र सरकाराच्या ह्या निर्णयाक आमी येवकार दितात. केंद्र सरकारान हो निर्णय खंयच्याच धर्मा आड न्हय, तर फक्त देशाच्या हितां खातीर घेतला. ते खातीर गोंयांतल्या मुस्लीम भावां-भयणींनी ह्या विधेयकाक येवकार दिवचो असो उलो मुख्यमंत्र्यांनी केलो.
मजगतीं, गोंयांत वक्फ मंडळ ना. खरें म्हणल्यार अशा मंडळाची कसलीच मालमत्ता लेगीत ना. देखून संसदेंत मंजूर जाल्ल्या ह्या विधेयकाचो गोंयचेर कसलोच परिणाम जावचो ना. राज्यांतले हिंदू, मुसलमान, क्रिस्तांव धर्माचे लोक आतां मेरेन बरेंपणान रावतात. फुडाराकय हो एकचार असोच उरचो, हें म्हत्वाचें अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
