भांगरभूंय | प्रतिनिधी
काँग्रेस आमदारांचो दावो
पणजी : बंगळूरच्या महादेवपुरा मतदारसंघांत जे तरेन मतदार नोंदणेंत गैरप्रकार जाला तशेंच गोंयांतूय जालां. एकाच घरांत ८० परस चड मतदारांची नोंदणी जाल्या. काँग्रेस पक्ष अभ्यास करून हो गैरप्रकार उक्तडार हाडटलें, अशें प्रदेश काँग्रेस अध्यक्ष अमित पाटकार हांणी सांगलें.
पाटकार हांणी काँग्रेस हावजान पत्रकार परिशद घेतली. ह्या वेळार उत्तर गोंय अध्यक्ष वीरेंद्र शिरोडकार, दक्षीण गोंय अध्यक्ष सावियो डिसील्वा, नितीन चोपडेकार हाजीर आशिल्ले.
पंदरा दीस चलिल्ल्या पावसाळी अधिवेशनांत काँग्रेसीच्या तिनूय आमदारांनी बरी कामगिरी करतना सरकाराचो गैरवेव्हार उक्तडार हाडलो. तारांकीत आनी अतारांकीत मेळून काँग्रेस आमदारांनी ८१० प्रस्न विचारिल्ले. ह्या सगळ्या प्रस्नांच्यो जापो काँग्रेसी कडेन आसा. विरोधी पक्ष फुडारी युरी आलेमाव, एल्टन डिकोस्ता आनी ऍड. कार्लोस फेरेरा हांणी प्रस्नोत्तर सत्रा सयत चर्चे वेळार राज्याचे प्रस्न समर्थपणान मांडले, अशें प्रदेश काँग्रेस अध्यक्ष अमित पाटकार हांणी सांगलेंं
प्रस्नोत्तर सत्राक काँग्रेस आमदारांचे चडशे प्रस्न चर्चेक आयले नात. तरी लेगीत सरकाराचो गैरवेव्हार उक्तडार हाडपाक काँग्रेस आमदारांक येस आयलें. लोकांनी लेगीत काँग्रेस आमदारांच्या विधानसभेंतल्या कामगिरीची तोखणाय केली. लोकांनी मांडिल्ल्यो समस्या प्रस्नाच्या रूपांत आमदारांनी सभाघरांत मांडल्यो. इबाडिल्ली कायदो सुवेवस्था, बेकायदो जमीन रूपांतरण, नुस्तेंमारी खात्यात नोकर भरतींतलो गैर वेव्हार, ४५०० कोटींवेर थकीत ग्रीन सेस, भूनक्शा गैरवेव्हार सभाघरात काँग्रेस आमदारांनी उक्तडार हाडलो, अशें अमित पाटकार हांणी सांगलें.
कोमुनिदाद जमिनींतलीं घरां अधिकृत करपाचें विधेयक हो कोमुनिदादीचे जागे हडप करपाचो येत्न आसा. हाचे पयलीं मंत्र्यांनी कोमुनीदादीचे जागे हडप करपाचे प्रकार घडल्यात. हो गैरवेव्हार काँग्रेस उक्तडार हाडटली, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
