भांगरभूंय | प्रतिनिधी
भांगरभूंय । प्रतिनिधी
पणजीः सुमार 30 ऍम्बुलन्सी आनी 50 बायक ऍम्बुलन्सी घेवन राज्यांतली ऍम्बुलन्स सेवा सुसज्ज करतले. 10 कार्डियाक अॅम्बुलन्सी घेवन काळजा आताक आयिल्ल्यांचेर तांच्या घरा वचून उपचार करतले, अशें भलायकी मंत्री विश्वजीत राणे हाणी सांगलें. पॉवर ग्रीड ऑफ इंडिया वतीन भलायकी खात्याक 8 ऍम्बुलन्सी भेट दिल्यात. आल्तिनो-पणजे वन भवना हांगा राणेच्या हस्तुकीं तांचें उक्तावण जालें. ह्या वेळार ते उलयताले.
सध्या 14 ऍम्बुलन्सी कावलांत काडपाचे स्थितींत आयल्यात.ताचे सुवातेर नव्यो ऍम्बुलन्सी आसतल्यो. दरेका ऍम्बुलन्सींत एक दोतोर आसतोलो. बायक ऍम्बुलन्स संकल्पनेची पूनर्रचणूक करतले. फुडल्या चार ते पांच म्हयन्यांत भितर 50 नव्यो बायक अॅम्बुलन्सी घेतले.ताचो उपेग चड करून दर्या देग वाठारांत करतले. दर्यांत कोणूय बुडल्यार ताचेर मुळावे उपचार करपाचें काम ह्या ऍम्बुलन्सीन करतले अशें राणेन सांगलें.
कॅन्सर उपचारांत गोंय मॉडेल
गोंयांत कॅन्सर हॉस्पिटला उबारपाच्यो सगळे सोपस्कार पुराय जाल्यात. कॅन्सर पॅट स्कॅन करपाची सुविधा बांबोळेच्या जीएसींत एक ते दोन म्हयन्यां भितर सुरू जातली. भायल्या राज्यांनी पॅट स्कॅन करपा खातीर बरेच दुडू मोडचे पडटात. गोंयकारांक जीएमसींत ही सुविधा फुकट मेळटली. मुख्यमंत्री डॉ प्रमोद सावंत हांणी हाका मान्यताय दिल्या अशी म्हायती राणे हाणे दिली.
काळाजाचो आकात आयल्या उपरांत रोखडेच प्रशिक्षीत वैजकी अधिकारी स्टेमी इजेसांव दितांत. गोंयातल्या मुळाव्या आनी सामूहीक भलायकी केंद्रानी स्टेमीची सुविधा दिवपा खातीर सगळे सोपस्कार रोखडेच पुराय करतले. ते भायर काळाजाच्या आकाताच्या उपचारांखातीर नवे दोतोर आनी सर्जन नेमतले. सध्या डॉ. सनद पाटकार हांची मुख्य सल्लागार म्हणून नेमणूक केल्या अशें विश्वजीत राणे हांणी सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
