भांगरभूंय | प्रतिनिधी
वन नेशन वन रेशन येवजणेचो 2300 बिगर गोंयकार घेतात लाव
भांगरभूंय । समीप नार्वेकार
पणजी : गोंयाच्या सोसायटींतल्यान रेशन घेवपी सगल्यांत व्हडलो वांटो बिहार आनी उत्तर प्रदेश (यूपी) ह्या राज्यांतल्या लोकांचो आसा. गोंयांत काम करपी उत्तर प्रदेशांतले सुमार 900 लोक आनी बिहारचे सुमार 800 परस चड लोक दर म्हयन्याक गोंयांत रेशन घेतात. तांचे कडेन गोंयचे रेशन कार्ड ना, पूण वन नेशन वन रेशन येवजणे खाला आपल्या राज्यांतल्या रेशन कार्डाचो वापर करून गोंयांत ते रेशन घेतात, अशी म्हायती नागरी पुरवण खात्याच्या वरिश्ठ अधिकाऱ्यान दिली.
देशांत खंयूय आसूं आपल्या राज्यांतल्या रेशन कार्डाचो वापर दुसऱ्या राज्यांत करून रेशन घेवपाक मेकळीक दिवपी वन नेशन वन रेशन येवजण केंद्र सराकारान चालीक लायल्या. हे येवजणे खाला खंयच्याय दुसऱ्या राज्यांतलो मनीस गोंयांत येता आनी गोंयचें रेशन कार्ड ताचे कडेन ना जाल्यार तो आपल्या राज्यांतल्या रेशन कार्डाचो वापर करून गोंयांत कड्डण घेवपाक शकता.
फक्त राष्ट्रीय अन्न सुरक्षा येवजणे (एनएफएसए) खाला येवपी एएवाय आनी पीएचएच कार्डा धारकांकूच वन नेशन वन रेशनाचो लाव घेवपाक मेळटा. गरिबी रेशे वयर आशिल्ल्या कार्ड धारकांक हे येवजणेचो लाव मेळना. हे खातीर वेगळी नोंदणी करपाची गरज ना. तांणी आपल्या राज्यांतले कार्ड हाडचें आनी तेंच सोसायटींत दाखोवन रेशन घरा घेवन वच्चें, अशे अधिकाऱ्यान सांगलें.
आतां मेरेन सुमार 2300 भायल्या राज्यांतले रेशन कार्ड धारक वन नेशन वन रेशन येवजणे खाला गोंयांत रावून रेशन घेतात. आठ राज्यांतले लोक गोंयांत रावून रेशनाचो लाव घेतात. तातूंत सगल्यांत चड 926 उत्तर प्रदेशांतले जाल्यार 971 बिहारचे नागरीक आसात. तशेंच कर्नाटकांतल्या 308 लाभार्थ्यां सयत तिसरे सुवातेर आसा. हेर राज्यां देखीक आंध्र प्रदेश 5, हरियाणा 12, मध्य प्रदेश 92, महाराष्ट्र 91 आनी राजस्थानाचे 24 नागरीक गोंयांत रेशन घेतात, अशी म्हायती अधिकाऱ्यान दिली.
वन नेशन वन राशन खाला भायला राज्यातल्या एएवाय कार्ड धारकांक मुख्यमंत्री फुकट एलपीजी हे गोंय राज्यांचे येवजणेचो मात कसलोच लाव मेळना, अशेंय अधिकाऱ्य़ान स्पश्ट केले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
