भांगरभूंय | प्रतिनिधी
पणजी ः गोंयची संस्कृताय शांततायेची आसा. गोंयांत रावपी परप्रांतीयांनी गोंयची संस्कृती, दायज हांचो आदर करपाक जाय अशें मुख्यमंत्री डॉ.प्रमोद सावंत हांणी सांगलें. शेनवारा पणजेंत बिहार दीस मनयलो. त्या वेळार आयोजीत केल्ले कार्यावळींत ते उलयताले. ह्या वेळार केंद्रीय संरक्षण राज्यमंत्री संजय शेठ, खासदार सदानंद शेट तानावडे, भाजपाचे प्रदेशाध्यक्ष दामू नायक आनी हेर लोक हाजीर आशिल्ले.
एक भारत श्रेष्ठ भारत ह्या तत्वाचेर भाजपाचो विस्वास आसा. सध्या जायते बिहारी कामा खातीर गोंयांत रावतात. तांणी हांगाची संस्कृताय समजूंक जाय. गोंयचे लोक शांततायेचे मोगी, अतिथी देवो भव ही तत्वा मानपी, झगडीं न करपी, आनी हांगा येवपी लोकांचेर मोग करपी आसात. मुळ बिहारांतल्या कांय लोकांची दुसरी पिळगी सध्या हांगा रावता. तांणी गोंयची संस्कृताय आपणावपाक जाय. बिहारांतल्यान हांगा कामाक येवपी हेर लोकांनीय गोंयची संस्कृताय पाळची अशें मुख्यमंत्र्यांनी सांगलें.
गोंयांत जाल्ल्या गुन्यांवांनी बिहारी मनशाचें नांव घेवप बिहारांतल्या लोकांक आवडचें ना. देखून बिहारांतल्यान हांगा येवपी लोकांक सगळ्या धर्मांक मान दिवपी आनी समानतायेचो आदर करपी हांगाचे शांतताय मोगी संस्कृताये विशीं समजून सांगपाक जाय अशेंय तांणी सांगलें.
कांय जाणांची जल्मभूंय बिहार आसली तरी गोंय ही तांची कामाची सुवात. तांकां गोंयचे पर्यावरण, संस्कृताय, लोकांचो मोग आसा. गोंयचें पर्यावरण नितळ आनी सोबीत दवरपाक हांगाच्या बिहारी लोकांचें योगदान गरजेचें.
डबल इंजिनाक लागून बिहाराची उदरगत
केंद्रांत आनी बिहारांत भाजपाच्या डबल इंजिन सरकाराक लागून बिहाराची उदरगत जाता. स्वावलंबी आनी विकसीत बिहारा खातीर राज्यांत भाजपा सरकार परत एक फावट सत्तेर येवप गरजेचें आसा अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
