भांगरभूंय | प्रतिनिधी
भारत सरकारान अधिकृतपणान तीन खेळां खातीर ई-स्पोर्ट्स सर्त जाहीर केल्या. हातूंत बीजीएमआय, ई फुटबॉल आनी डब्ल्यूसीसी3 हांचो आस्पाव आसा.
बॅटल ग्रावण्ड्स मोबायल इंडिया (बीजीएमआय) ही देशांतली लोकप्रीय मोबायल गेम आसा. सरकार पयलेच खेपे वस्तादपणाची कार्यावळ गोंयांत आयोजीत करतली. हे सर्तींत वांटो घेवपा खातीर देशांतले खेळगडे आपल्या पंगडांची नोंदणी करपाक शकतात.
भारत सरकारान हालींच क्रिएट इन इंडिया चॅलेंज सिझन 1 लॉन्च केला, हातूंत गेमींग, अॅनिमेशन, संगीत आनी व्हिज्युअल आर्ट्स सयत वट्ट 25 सर्तींचो आस्पाव आसा.
प्रधानमंत्री नरेंद्र मोदी हांणी हाचे पयलीं साबार खेपे गेमींग आनी ई-स्पोर्ट्स विशीं उलयल्यात आनी सरकार भारताचे उदरगती खातीर पावलां उबारतलें अशें सांगलां. ई-स्पोर्ट्स इव्हेंट हो ह्याच उपक्रमाचो एक भाग आसा, जंय खेळगड्यांक तांची प्रतिभा आनी कुशळटाय दाखोवपा खातीर वाडीव संद मेळटा, जैतिवंतांक रोख इनामां आनी भेट वस्तू दितले.
बीजीएमआय सर्ती खातीर पात्रताय फेरी चार बॅचींनी घेतले. दरेक बॅचींतले सर्वोत्कृश्ट तीन पंगड, म्हणल्यार पात्रताय फेरयेंतले वट्ट 12 पंगड, ग्रॅण्ड फायनली खातीर वेंचतले. हेर देशांतले चार पंगडांक निमाणे फेरयेंत वांटो घेवपा खातीर थेट आमंत्रीत करतले.
गोंयांत 20 ते 24 नोव्हेंबर ह्या कालावधीत वट्ट 16 निमाणे फेरयेचे स्पर्धक एकामेका आड खेळटले. सर्तीची उपांत्यपुर्व, उपांत्य आनी भव्य निमाण्या टप्प्यांचें युट्युबाचेर थेट प्रक्षेपण लेगीत करतले.
कार्यावळीचें वेळापत्रक सकयल दिल्ल्या प्रमाण आसा
पात्रताय (ऑनलायन)
1 ते 15 सप्टेंबर,
18 ते 2 ऑक्टोबर,
4 ते 19 ऑक्टोबर,
21 ऑक्टोबर ते 4 नोव्हेंबर
ग्रॅण्ड फायनल (एलएएन)
20 ते 24 नोव्हेंबर
बीजीएमआय सर्तींत खेळपा खातीर खंयच्या देशांतल्या पंगडांक आमंत्रीत करतले हें भारत सरकारा अजून सांगूंक ना. ही कार्यावळ निश्चीत रितीन गेमर्सां मदीं खूब उमेद निर्माण करतली आनी देशांत ई-स्पोर्ट्स आनी गेमिंगेक उर्बा दितली.
बिहार सारक्या कांय राज्य सरकारांनी फाटल्या कांय वर्सांनी अधिकृतपणान ई-स्पोर्ट्साचें आयोजन केलां. तथापी, भारत सरकार ईस्पोर्ट्स सर्त आयोजीत करपाची ही पयलीच खेप आसा. 2023त क्राफ्टनान बीजीएमआय वांगडा सर्तीचें आयोजन केल्लें, हातूंत भारत आनी कोरियाच्या पंगडांनी वांटो घेतिल्लो. उक्तावणाच्या दिसा भारत आनी दक्षीण कोरिया सरकाराचें कांय वांगडी लेगीत उपस्थीत आशिल्ले. क्राफ्टन दर वर्सा व्हड इनाम पुल सयत साबार ईस्पोर्ट्स कार्यावळी आयोजीत करता. बीएमपीएस 2024, ही 2 कोटी रुपयांचे इाम आशिल्ली सर्त सध्या चालू आस आनी तिचो ग्रॅण्ड फिनाल सप्टेंबर म्हयन्यांत केरळांत जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
