भांगरभूंय | प्रतिनिधी
पणजी : गोंयांत आयिल्ले त्रासीक अणभव सांगपा खातीर पर्यटक आतां सोशल मिडियाचो वापर करपाक लागल्यात. फाटल्या कांय सप्तकांत पर्यटकांनी सोशल मिडियावेल्या विवीध माध्यमांचो वापर करीत आपल्यो भावना उक्तायल्यात. हातूंत छळ, धमकी, चड पयशे घेवप आनी हेर कांय घडणुकांचो आसपाव आसा.
पर्यटकांनी अपलोड केल्ले व्हिडिओ, पोस्ट पुलिसांचें लक्ष ओडून घेवपी थारल्यात. ते प्रमाण पुलिसूय फुडली कारवाय करतात.
सध्या एक नवी इकोसिस्टम आमकां पळोवपाक मेळटा, जंय अधिकृत सरकारी यंत्रणां न्हय तर इंस्टाग्राम, फेसबूक पर्यटकां खातीर मजत थारता.
व्हायरल कागाळी
हालींच घडिल्लें प्रकरण तें म्हणल्यार सौम्या खन्ना, हांणी घाल्ले व्हिडियो. तिणें अश्लील टिप्पणी करपी, त्रास दिवपी तरणाट्यांचे व्हिडियो शॅर केल्ले. ती विदेशी नागरीक समजून त्या तरणाट्यांनी तिका बरीच सतायल्ली. ह्या पोस्टाक लागून लोक बरे तिडकल्ले आनी ते तिडकीन लोकांनी आपापल्यो प्रतिक्रियाय कमेंटां वरवीं उक्तायिल्ल्यो.
हो व्हिडियो व्हायरल जाले उपरांत गोंय पुलिसांच्या सोशल मिटिया मॉनिटरिंग सेलान सरळ सौम्या खन्ना हिचे कडेन संपर्क करून कारवाय करपा खातीर सविस्तर तपशील मागयिल्लो. उपरांत एफआयआर दाखल केल्ली. हे एफआयआरी वेल्यान राजस्थानांतल्या एका मनशाक अटक केल्ली आनी हेरांचोय सोद पुलीस घेतात.
हे विशीं म्हायती दितना उत्तर गोंय पुलीस अधीक्षक राहुल गुप्ता हांणी अशी वागणूक सोसून घेवचे ना अशें सांगलें.
गोंय पुलीस दरेके कागाळींची खरपणान दखल घेतात, विशेश म्हळ्यार पर्यटकांचे सुरक्षीतताये कडेन संबंदीत कागाळी जेन्ना आमच्या लक्षांत येतात तेन्ना आमी तांचें रोखडेंच व्हॅरिफीकेशन करतात आनी करवाय सुरू करतात, अशें तांणी म्हणलें.
कांय दिसां पयलीं, हरमल दर्यादेगेर एक गट दोन परदेशी बायलां भोंवतणी बळयां हात दवरून तांचे फोटो काडटना आनीक एक व्हिडियो सोशल मिडियाचेर आयलो.
उपरांत पर्यटक पुलिसांनी एफआयआर दाखल करून कर्नाटकांतल्या तीग मनशांक भारतीय न्याय संहिते खाला विनयभंगा कडेन संबंदीत कलमां खाला अटक केली.
आनीक एका वेगळ्या प्रकरणांत, जर्मन प्रवासी अलेक्झांडर वेल्डर हांणी टॅक्सींत चड पयशे घेतात अशी म्हायती शेअर केली.
रिक्षा चालकान ५०० रुपया मागले आनी गोवा मायल्साचें दर ३०० रुपया आशिल्ल्याचें तांणी नमूद केलें.
मात, गोवा मायल्साचें बुकींग त्या वाठारांत बंद आशिल्लें, अशेंय तांणी नमूद केलें. उपरांत पुलिसांनी तांचे कडेन संपर्क केलो आनी म्हायती घेवन कारवाय करतले अशें आस्वासन तांकां दिलें.
कागाळी नोंद करपाक माध्यम ना म्हूण….
पर्यटकांच्यो कागाळी नोंद करपा खातीर समर्पीत अशें कसलेंच डिजिटल प्लॅटफॉर्म नाशिल्ल्यान इंस्टाग्राम आनी ट्वीटर हे प्लॅटफॉर्म सध्या हॅल्पलायन जाल्यात.
गोवा कॅनचे समन्वयक रोलँड मार्टिन्स हांणी सांगलें, ह्या नव्या ट्रँडाक लागून बर्याच काळांतली धोरणात्मक पोकळी उक्तडार येता. पर्यटकां कडेन गिरायक म्हणून पळोवपाक जाय आनी दरेका गिरायकाक संरचीत अभिप्राय प्लॅटफॉर्मची गरज आसा.
आमी अभ्यागतांक आमंत्रीत करपाक शकनात आनी तांणी स्वताची काळजी घेवची अशी अपेक्षा करपाक शकना, अशें तांणी म्हणलें.
मार्टिन्स हांणी निदर्शनाक हाडलें, परदेशी लोकां कडेन संबंदीत खुबश्या घटनांची नोंद करिनात, कारण तांचें दस्तऐवजीकरण करपा खातीर कसलीच सुरळीत प्रणाली ना.
पर्यटक आनी थळाव्यां खातीर एक अधिकृत सोशल मीडिया कागाळ प्लॅटफॉर्म तयार करप, संबंदीत विभागां कडेन कागाळ धाडपा खातीर नोडल अधिकारी नियुक्त करप आनी मेळिल्ल्यो कागाळी आनी केल्ल्या कागाळींचे तीन म्हयन्यांचे अहवाल प्रकाशीत करप, पारदर्शकताय आनी विस्वास निर्माण करप गरजेचें आशिल्ल्याचें मार्टीन्स हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
