भांगरभूंय | प्रतिनिधी
6.40 लाख चौ. मि. जमनीर भुतानी, डीएलएफ, लोढा रिअल इस्टेट प्रकल्पांचो आस्पाव
भांगरभूंय । समीप नार्वेंकार
पणजीः दिल्लीचे पेझाद रिअल इस्टेट कंपनी देखीक भुतानी, डीएलएफ आनी लोढा हांचे गोंयांत 6.40 लाख चौखण मिटर जमनीर 1134 कोटी खर्चाचे राबितो प्रकल्प येवपाचे आसात. ह्या प्रकल्पांक काम सुरू करपा खातीर मान्यताय दिल्या, पूण वाडत्या विरोधांक लागून ह्या प्रकल्पांचें काम सध्या आडखळ्ळां.
हे वळेरेंत भुतानीचो एक प्रकल्प आनी लोढाचे तीन प्रकल्पा मदलो एक प्रकल्प सांकवाळे येवपाचो आसा. लोढाचे उरिल्ले दोन प्रकल्प कारापूर दिवचले जाल्यार डीएलएफाचो एक प्रकल्प रेईश मागूस येता. सगळ्यांत व्हडलो प्रकल्प लोढाचो दिवचले वन गोवा प्रकल्प आसा तो 2 लाख चौखम मिटर जमनीर येवपाचो आसा, जाल्यार एक लाख चौखण मिटर जमनीर येवपी डीएलएफचो प्रकल्प दुसरे सुवातेर आसा. सांकवाळे वादग्रस्त भुतानी प्रकल्पा वांगडाच लोढाचो गल्फ ऑफ गोवा हो प्रकल्प येवपाचो आसा.
भुतानी- एक्वा इडन वादग्रस्त भुतानीचो एक्वा इडेन हो राबितो प्रकल्प 35,050 चौखण मिटर सुवातेंत 434 कोटी खर्चून येवपाचो आसा. भुतानीन हो प्रकल्प पर्वेश कंन्शट्रंकशन कंपनी हे प्रवर्तक वरवीं हातांत घेतला. अमीत कुमार तनेजा ह्या प्रकल्पाचे अधिकृत व्यक्ती आसात जाल्यार प्रेम भुतानी, आशिष भुतानी आनी इनायत भुतानी ह्या प्रकल्पाच्या संचालक मंडळाचेर आसात.
ह्या प्रकल्पा खातीर 7,688 चौखण मिटर जमनीर 30 व्हिलां खातीर (बंगले) इनव्हेंट्री केल्या आनी 29,902 चौखण मिटर जमनीर 660 फ्लॅटां खातीर इनव्हेंट्री जाल्या. 10 फेब्रुवारी 2024 ह्या दिसा प्रकल्प सुरू करपाक मान्यता मेळिल्ली आनी 31 डिसेंबर 2028 ह्या दिसा हो प्रकल्प पुराय जावपाचो आसलो. पूण आतां हे ह्या प्रकल्पाक थळाव्या लोकांच्या वाडट्या विरोधाक लागून ह्या प्रकल्पाक कारणा दाखयात नोटीस जारी केल्ल्यान तशेंच ह्या प्रकल्पाक दिल्ले दाखले मुख्यमंत्र्यान रद्द करपाची शिटकांवणी दिल्ल्यान ह्या प्रकल्पाचो फुडार सध्यातरी काळखांत आसा. ह्या प्रकल्पा खातीर जमीन विकती घेवपाचें सेल डीड 14 जुलय 2023 ह्या दिसा जाल्लें. एनएस कंन्सट्रंक्शन प्रा. लि. हांणी ही जमीन पर्मेश कंन्शट्रक्शन कंपनीक विकल्या. व्हिक्टर गोन्साल्वीस आनी तांची घरकान्न मारिया फिलोमेना लोबो इ गोन्साल्वीस हे जमनीची मूळ धनी.
डीएलएफ- दी बे व्हीव मांडवी न्हंयेदेगेक रेईश मागूस वाठारांत दिल्ली लॅण्ड फायनान्स (डीएलएफ) हांचो दी बे व्हीव हो राबितो प्रकल्प 1,06,346 चौखण मिटर जमनीर 443 कोटी खर्चून येवपाचो आसा. प्रवर्तक डीएलएफ एक्सक्लुसीव फ्लोर्स प्रा. लि. हांणी प्रकल्पाचें काम हातांत घेतलां. राजेश कुमार भाटीया ह्या प्रकल्पाचे अधिकृत व्यक्ती आसा जाल्यार जितेंद्र कुमार पाटील, मनप्रित सिंह, रविंद्र वर्मा आनी संजय भारद्वाज ह्या प्रकल्पाचे मंडळ वांगडी आसात.
ह्या प्रकल्पा खातीर 2283 चौखण मिटर जमनीर 84 व्हीला (बंगले) खातीर इनव्हेंट्री केल्या. ह्या प्रकल्पाचें काम सुरू करपाक 30 मार्च 2022 ह्या दिसा मान्यताय मेळिल्ली आनी 31 मार्च 2027 मेरेन हो प्रकल्प पुराय जावपाची शक्यताय आसा. पूण सध्या होय प्रकल्प वादांत सांपडला. हे जमनी वयलो दोंगर बेकायदेशीर तरेन कांतरपाचें काम डीएलएफ हांणी हातांत घेतिल्ल्यान ह्या प्रकल्पाक विरोध जाता. ह्या प्रकल्पा कडेन वचपी रस्त्याचें 33 टक्के काम पुराय जालां जाल्यार उदकाची, लायटीची आनी सिवेजीची जोडणी अजून मेळूंक ना. ह्या रस्त्या खातीर थळावे कोमुनिदादीन जमीन दिल्या.
ह्या प्रकल्पा खातीर जमीन विकती घेवपा खातीरचें सेल डीड 23 सप्टेंबर 2014 ह्या जालां. डीएलएफ हांणी ही जमीन ब्ल्यू कोस्ट इन्फ्रास्ट्रक्चर डेव्हलपमेंट प्रा. लि. हांणी डेलेन्को होम अॅण्ड रिसोर्टस प्रा. लि. हाका विकिल्ली. डेलेन्को होम अॅण्ड रिसोर्टसचें नांव बदलून आतां डीलएफ एक्सक्लुजीव होम्स जालां. रामकृष्ण वासुदेव पै धुंगट हे जमनीचे मूळ धनी आशिल्ले.
लोढा- वन गोवा भाग 1
दिवचलच्या कारापूर वाठारांत हावस ऑफ अभिनंदन लोढा हांचो वन गोवा भाग 1 हो राबितो प्रकल्प 211 कोटी खर्चून 1,18,129 चौखण मिटरा जमनीर येवपाचो आसा. प्रवर्तक एरिश्टर इन्फ्रा प्रा. लि वरवीं लोढा हांणी हें काम हातांत घेतलां. राकेश रामदास गुप्ता ह्या प्रकल्पाचे अधिकृत व्यक्ती आसात. 24 एप्रील 2024 ह्या दिसा हे जमनीर प्लाटींग करपाच्या कामाक मान्यताय मेळिल्ली आनी 31 मार्च 2029 मेरेन हें काम पुराय जावपाची शक्यताय आसा. 1,00,838 चौखण मिटर जमनीर 625 प्लॉटां खातीर इनव्हेंटरी केल्या आनी तातूंतल्या 197 इनव्हेंटरींत बदल करून हे प्लॉट विकल्यात. कारापूर इस्टेट प्रा. लि. हाणी ही सुवात एरिश्टर इन्फ्रा प्रा. लि. हाका विकिल्ली आनी हाची सेल डीड 12 मार्च 2024 ह्या दिसा जाल्लें. रावजी राणे हे जमनीचे मूळ धनी आशिल्ले.
लोढा- वन गोवा भाग 2
भाग एका कुशिकूच लोढाचो वन गोवा भाग 2 हो दुसरो प्रकल्प 21,44,96 चौखण मिटर जमनीर येता. ह्या प्रकल्पाचो खर्च 199 कोटी आसा. तीच कंपनी एरिश्टर इन्फ्रा प्रा. लि. थंय प्लॉटिंगाची उदरगत लोढा वरवीं करता. राकेश रामदास गुप्ता ह्या प्रकल्पाचे अधिकृत व्यक्ती आसात. 24 एप्रील 2024 ह्या दिसा हे जमनीर प्लाटींग करपाच्या कामाक मान्यताय मेळिल्ली आनी 31 मार्च 2029 मेरेन हें काम पुराय जावपाची शक्यताय आसा. 1,15,143 चौखण मिटर जमनीर 758 प्लॉटां खातीर इनव्हेंटरी केल्या आनी तातूंतले 157 प्लॉट विकल्यात. ही जमीन लेगीत एरिश्टर इन्फ्रा प्रा. लिं हाणी कारापूर इस्टेट प्रा. लि. हाचे कडल्यान विकती घेवन, 12 मार्च 2024 ह्या दिसा सेल डीड जाल्लें. हे जमनीचे मूळ धनी रावजी राणे हेच आशिल्ले.
लोढा – गल्फ ऑफ गोवा
वादग्रस्त भुतानी प्रकल्पाच्या कांय अंतरा मुखार सांकवाळे दर्यादेगे लागसार व्हडलो हावस ऑफ अभिनंदन लोढा हांचो 235 कोटींचो गल्फ ऑफ गोवा राबितो प्रकल्प 96,709 चौखण मिटर जमनीर येता. लोढा वरवीं इम्पेक्टम लॅण्ड्स प्रा. लिं ह्या प्रवर्तकान हे जमनीर प्लॉटिंगाचें काम हातांत घेतलां. राकेश रामदास गुप्ता ह्या प्रकल्पाचे अधिकृत व्यक्ती आसात. ह्या कामाक 11 ऑगस्ट 2023 ह्या दिसा मान्यताय मेळिल्ली आनी 31 ऑगस्ट 2027 मेरेन ह्या प्रकल्पाचें काम पुराय जावं येता. ह्या प्रकल्पा खातीर दक्षीण गोंय जिल्होधिकाऱ्यान दिल्ले रुपांतरण सनदी प्रमाण हे जमनीर कसलेय बांदकाम हातांत घेवचे पयलीं नौदळाचे कमांडीग फ्लॅग अधिकारी हांचे कडल्यान ना हरकत दाखलो घेवप सक्तीचे केल्लें. ते प्रमाण प्रवर्तकांक काय अटी घालून नौदळान ना हरकत दाखलो दिला. ह्या प्रकल्पा खातीर रस्त्याचें काम 40 टक्के पुराय जालां, उदक पुरवणेचें काम 30 टक्के, जाल्यार सिवेज, लायट आनी कोयराचें काम अजून हातांत घेवंक ना. हे जमनीर 315 प्लॉटां खातीर इनव्हेंट्री जाल्या आनी 168 प्लॉट विकल्यात. अल्ट्रा ड्वेल रिअल इस्टेट एलएलपी हाचे कडल्यान इम्पेक्टम लॅण्डस प्रा. लि. हाणी विकती घेवन 9 ऑगस्ट 2023 ह्या दिसा ताचें सेल डीड जाल्लें. मुळांत ही जमीन सांकवाळ कोमुनिदादीन बिर्ला ग्वालियर प्रा. लि. हाका लिजार दिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
