भांगरभूंय | प्रतिनिधी
पणजी: युपीआय वरवीं पेमेंट करप हो पर्याय सोंपो जाला. वापरपाक सोंपो, सुरक्षीत आशिल्ल्यान युपीआयचो वापर वाडत आसा. हाका लागून फाटल्या एका म्हयन्यांत गोंयांत युपीआय पद्दतीन जाल्ल्या वेव्हारांत 679 कोटी रुपयांची वाड जाल्या.
सप्टेंबर म्हयन्यांत गोंयांत युपीआय वरवीं 4603 कोटी रुपया जाल्ले. ऑक्टोबरांत तो वाडून 5282 कोटी रुपया जाले. केंद्रीय अर्थ खात्यान जारी केल्ल्या अहवालांतल्यान ही म्हायती मेळ्ळ्या.
युपीआय अॅपांत विवीध बँकांच्या अॅपा सयत युपीआय अॅपांत विविध बँकाच्या अॅपा सयत, भीमअॅप, गुगल पे, फोनपे, पेटीएम अशा अॅपांचो आस्पाव आसा. मे म्हयनो सोडून फाटल्या कांय म्हयन्यांत गोंयांतल्या युपीआय वरवीं पेमेंट करप हाचें प्रमाण वाडलां. गोंयांत एप्रील म्हयन्यांत 5041 कोटी, मे म्हयन्यांत 5659 कोटी, जूनांत 4053 कोटी, जुलयांत 4347 कोटी जाल्यार ऑगस्टांत 4537 कोटी रुपयांचे वेव्हार जाल्ले. एप्रील ते ऑक्टोबर मजगतीं, युपीआय वरवीं पेमेंट करपाक गोंयांत देशांत 23 वें आसा.
पुराय देशाचो विचार करीत जाल्यार ऑक्टोबर म्हयन्यांत महाराष्ट्रांत 2.67 लाख कोटी परस चड रुपयांचो वेव्हार हे युपीआय पद्दतीन केल्यात. हाचे उपरांत उत्तर प्रदेश (1.53 लाख कोटी), कर्नाटक (1.50 लाख कोटी), तेलंगणा (1.30 लाख कोटी) ह्या राज्यांचा क्रमांक लागता. नागालॅण्ड, मिझोराम, त्रिपुरा हीं राज्यां युपीआय वेव्हाराचे तुळेन उणीं आसात. ऑक्टोबरांत पुराय देशांत सुमार 76 हजार कोटी रुपयांचे युपीआय वेव्हार हे ग्रॉसरी दुकानां वा सुपर मार्केटांत जाल्ल्याचें अहवालांत म्हणलां.
म्हयन्याक 3.58 कोटी ट्रांजेक्शनां
अर्थ खात्याचे आंकडेवारी प्रमाण गोंयांत ऑक्टोबर म्हयन्यांत जाल्ल्या वट्ट वेव्हारां खातीर 3.58 कोटी ट्रांजेक्शनां जाल्यांत. हाचोच अर्थ दिसाक सरासरी 11.54 लाख युपीआय अॅप ट्रांजेक्शनां जाल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
