भांगरभूंय | प्रतिनिधी
पणजी : गोंयांत 2019 ते 2023 ह्या काळांत 527 बायलांक गर्भाशयाच्या क्रांकाचें निदान जाल्लें. हाचोच अर्थ गोंयांत वर्साक 105 जाल्यार म्हयन्याक सरासरी 8 बायलांक गर्भाशयाचो क्रांक जाल्लो.
वयल्या काळांत पुराय देशांत 3.85 लाख बायलांक क्रांक जाल्ल्याचें निदान जालें. केंद्रीय भलायकी राज्यमंत्री प्रतापराव जाधव हांणी लोकसभेंत दिल्ले लेखी जापेंतल्यान ही म्हायती मेळ्ळ्या. हे संबंदांत खासदार बाग मिताली हांणी प्रस्न विचारिल्लो.
जापेंत दिल्ले म्हायती प्रमाण, वयल्या काळांत गोंयांत गर्भाशयाचो क्रांक आशिल्ल्या बायलांचो आंकडो मात्सो वाडला. 2019 त 101 बायलांक हो क्रांक जाल्लो. 2020 त 104, 2021 त 106, 2022 त 107 आनी 2023 त 109 बायलांक गर्भाशयाचो क्रांक जाल्ल्याचें निदान जाल्लें.
उत्तर प्रदेश, महाराष्ट्र, तामिळनाडू ह्या राज्यांत दुयेंतींचो आंकडो तुळेंत चड आशिल्लो. जाल्यार सिक्कीम, अरुणाचल प्रदेशांत दुयेंतींचो आंकडो उणो आशिल्लो. केंद्र सरकारा वतीन यूआयपी मोहिमे खाला 12 तरांच्या दुयेंसां खातीर 11 तरेचीं वासिनां दितात. तातूंत गर्भाशयाच्या क्रांका खातीरचें एचपीसी वासीन दिनात. अशें आसलें तरीय खात्या वतीन वैजकी कर्मचाऱ्यांक हे वासिनीकरणा खातीर तांक विकास कार्यावळी आयोजीत करतात. असंसर्गजन्य दुयेंसांचेर नियंत्रण दवरचे खातीर केंद्रा वतीन राज्य सरकारांक अर्थीक मजत दिता. ते प्रमाण देशभऱांत 36 राज्य केंद्रां, 753 जिल्हो केंद्रा, 770 जिल्हो हॉस्पिटलां उबारल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
