भांगरभूंय | प्रतिनिधी
केंद्रीय मंत्री नितीन गडकरी हांची लोकसभेंत लेखी जाप
गोंयांत 2013 ते 2022 मजगतीं विवीध प्रकारच्या बशींचे 2726 अपघात जाल्ले. हाचो अर्थ बसीचे म्हयन्याक सरासरी 22 अपघात जाले. ह्या अपघातांत खंयच्या ना खंयच्या प्रकारचे बसीचो आस्पाव आशिल्लो. केंद्रीय रस्ते येरादारी आनी म्हामार्ग मंत्री नितीन गडकरी हांणी लोकसभेंत दिल्ले लेखी जापेंतल्यान ही म्हायती मेळ्ळ्या. हे विशीं खासदार कृष्ण प्रसाद तेनेट्टी हांणी अतरांकीत प्रस्न विचारिल्लो.
जापेंत दिल्ले म्हायती प्रमाण वयल्या काळांत गोंयांत 2015 वर्सा सगल्यांत चड 535 अपघात जाले. उपरांत 2016 वर्सा 493, 2017 वर्सा 419 जाल्यार 2014 वर्सा 354 अपघात जाल्ले. 2021 वर्सा सगल्यांत उणे 47 अपघात जाल्ले. वयल्या काळांत पुराय देशांत बशीचे 2 लाख 40 हजार 141 अपघात जाल्ले. ह्या काळांत तामीळनाडूंत सगल्यांत चड जाल्यार मिझोरामांत सगल्यांत उण्या अपघातांची नोंद जाली.
केंद्र शासीत प्रदेशांत लक्षद्वीप हांगा सगल्यांत उणे म्हणल्यार शुन्य अपघात जाले जाल्यार दिल्लींत 2593 अपघात जाले.
पुराय देशांत 2013 ते 2022 मजगतीं बसीच्या विवीध अपघातांनी 86 हजार 627 लोकांक मरण आयलें. जाल्यार 2013 वर्सा सगल्यांत चड 12 हजार 469 मरण आयिल्ल्याची नोंद जाल्ली. 2014 वर्सा 12 हजार 185, 2015 वर्सा 12 हजार 133 मरण आयिल्ल्यांची नोंद जाली. उपरांत बस अपघातांत बळी पडपाची संख्या उणी जायत गेली. 2022 वर्सा अशा अपघातांत 3949 जाणांक मरण आयलें. केंद्र सरकार दर वर्सा रस्ते अपघातांचो अहवाल सादर करता. ही म्हायती राज्य सरकारा कडल्यान घेतात अशें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
