भांगरभूंय | प्रतिनिधी
दोन वर्सांत 44 हजार नोंदण्यो, 90 टक्के मालमत्तांची सेलडीड
पणजी : गोंयांत मालमत्तांत जावपी गुंतवणूक वाडल्या. फाटल्या दोन वर्सांत ही वाड चड आसा. लोक घर, भूखंड घेवपाक चड प्राधान्य दितात, अशें एकंदर आंकडेवारी वयल्यान दिसून येता. एका परस चड घरां आनी जमीन घेवपाक लोक चड पसंती दितात. तातूंतच गोंया भायल्या लोकांनी गोंयांत जमनी खरेदी करपाक चड पसंती दितात.
गोंयांत घरां, भूखंड हे सारक्या स्थावर मालमत्तांची खरेदी फाटल्या दोन वर्सांत तेजीत आसा. 2021-22 आनी 2022-23 ह्या दोन वर्सांत मालमत्ता खरेदी संदर्भांतल्यो वट्ट 44 हजारा वयर नोंदण्यो निबंधक खात्या कडेन जाल्यात. तातूंतल्यो सुमार 90 टक्के नोंदणी वैयक्तीक मालमत्तांच्यो आसात. 2021-22 त स्थावर मालमत्तांच्या खरेदी संदर्भांत 20 हजारा वयर नोंदण्यो जाल्यात. तातूंत घरां, भूखंड खरेदी, तांचें गिफ्ट म्हूण हस्तांतरण, तशेंच सामाजीक संस्थांच्या जमनींच्या नोंदण्यांचोय आस्पाव आसा. पूण ह्या 20 हजारांतल्याे सुमार 18 हजार नोंदण्यो ह्यो वैयक्तीक घर, भूखंड खरेदीच्यो आशिल्ल्यो, अशी म्हायती सुत्रांनी दिली.
2022-23 त सगल्याच नोंदण्यांत वट्ट चार हजारांनी वाड जाली. अंदूं वट्ट 24 हजार नोंदण्यो जाल्ल्यो. तातूंतल्यो सुमार 22 हजारा वयर चड नोंदण्यो घरां, भूखंड तशेंच हेर स्थावर मालमत्ता वैयक्तीक खरेदी केल्ल्याच्यो आसात, अशी म्हायती राज्य निबंधक खात्या कडल्यान मेळ्ळ्या.
एके वटेन वाहनांची खरेदी उणी जायत आसा, जाल्यार दुसरे वटेन दरवर्सा मोट्या प्रमाणांत लोक घरां, भूखंड खरेदी करतात. जमीन खरेदीतलीं गुंतवणूक कांय वर्सांतूच दुपेटी परस चड परतावाे दिता. ताका लागून जमीन खरेदीक लोक चड पसंती दितात.
थळाव्या सयत बिगर गोंयकार उद्देजक, वेवसायिकां कडल्यान गोंयांत घरां, भूखंड हे सारक्या स्थावर मालमत्ता खरेदी करपाक प्राधान्य दितात. घरां आनी जमनींचे दर सध्या हिसपा भायर वाडल्यांत. फुडाराचो विचार करून गोंयांत स्थावर मालमत्तांनी मोट्या प्रमाणांत अर्थीक गुंतवणूक करपाक लोकांनी सुरवात केल्या. ताका लागुनूच अशा मालमत्तांच्या खरेदी संदर्भांतल्या नोंदणींत दरेक वर्सा वाड जायत आशिल्ल्याचे मुखार आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
