भांगरभूंय | प्रतिनिधी
भांगरभूंय । प्रतिनिधी
पोरणे गोंयः गोंयांत भाजपाक हारोवपाची तांक फकत तृणमूल काँग्रेस पक्षा कडेन आसा असो दावो पक्षाचे खासदार डॅरेक ओब्रियन हांणे केला. तृणमूल काँग्रेस पक्षाच्या पिलार हांका आयतारा जाल्ले वावुरप्याचे बसके उपरांत ते पत्रकारां कडेन उलयताले. भाजपाक वेंचणुकेंत हारोवपा विशीं ,सध्या फकत तृणमूल गंभीर आसा. गोंयातले हेर राजकी पक्षां कडेन ही तांक मातूय ना, ते सगळे संदीसादू अशें तांणी सांगलें.
गोंयांतली बेरोजगारी, म्हारगाय तशेंच गोंयकारांच्यो समस्या हाचेर फकत तृणमूल काँग्रेस आवाज काडटा आनी हाचे फुडेंय आमी हें काम करीत रावतले अशें ओब्रियन हांणी सांगलें. आमकां गोंय, आसाम, त्रिपुरा, मेघालया आनी बंगालाचो आवाज जावपाचें आसा अशें सांगतना फुडल्या कांय म्हयन्यांत तृणमूलाचे राष्ट्रीय फुडारी गोंयांत येवपाचे आसात अशी म्हायती ताणे दिली.
आनीक चार म्हयन्यांनी परत एक फावट वावुरप्यांची बसका जातली आनी त्या वेळार राष्ट्रीय फुडारी वावुरप्यांक मार्गदर्शन करतले. ह्या वेळार हेर पक्षांतले कांय म्हत्वाचे फुडारी तृणमूल काँग्रेस प्रवेश करले अशें तांणे सांगलें. गोंयकारांनी काँग्रेस पक्षाक लागीं करपाक जायना. त्या पक्षाक मत म्हणल्यार भाजपाक मत अशेंय ताणे सांगलें. फाटल्या विधानसभा वेंचणुके वेळार पक्षा कडल्यान बऱ्योच चुको जाल्यो हे ऑब्रियन हांणी मानून घेतलें.
म्हादय प्रश्नाचेर गोंयकारांक फटयल्ले खातीर पक्षाचे गोंय प्रभारी किर्ती आझाद हाणे भाजपाचेर खर टिका केली. गोंयकारांच्या हक्का खातीर भाजपा फुडाऱ्यानी झूजपाक जाय, ते खातीर सत्ता गेली तरी ताची पर्वा करपाक जायना अशें ताणे सांगलें. कर्नाटक आकारान म्हटलें राज्य आसले तरी गोंयकारांच्या हिताचो बळी दिवपाक जायना अशेंय ताणे सांगलें.
फालेरो बसकेक गैर हाजीर
आयतारा जाल्ले वावुरप्यांचे बसकेत पक्षाचे राज्यसभा खासदार लुईझिन फालेरो गैर हाजीर आशिल्ले. मात ते विशी पक्षाच्या फुडाऱ्यांनी कसलोच खुलासो केलो ना. डॅरेक ओब्रियन हांका ते विशीं विचारले तेन्ना फालेरो हाणे आपल्याक तांच्या घरा सांजे च्या पियेवपाक आरयलां अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
