भांगरभूंय | प्रतिनिधी
पणजे संवसारीक भलायकी दीस उमेदीन मनयलो
पणजी: गोंयांत भलायकेच्या मळार उत्कृश्ट सुविधायो आशिल्ल्याचे भलायकी सचीव अरूण कुमार मिश्रा हांणी सांगलें. दोतोर आनी हेर भलायकी कर्मचार्यांनी दुयेंतींक बर्यांतली बरी उपचार सुविधा दिवची अशें तांणी फुडें म्हणलें.
भलायकी सेवा संचालनालयाच्या भलायकी शिक्षण मंडळा वतीन पणजे मिनेझीस ब्रागांझा सभाघरांत आयोजीत कार्यावळींत संवसारीक भलायकी दीस उमेदीन मनयलो. ‘सगळ्यां खातीर भलायकी’ अशी ह्या वर्साच्या संवसारीक भलायकी दिसाची संकल्पना आसा. प्रत्येक वर्सा 7 एप्रिलाक संवसारीक भलायकी दीस मनयता. अरूण कुमार मिश्रा हे कार्यावळीचे मुखेल सोयरे ह्या नात्यान उलयताले.
भलायकी सेवा संचालक डॉ. गीता काकोडकार हांणी गोंयच्या नागरिकांक दर्जेदार भलायकी सेवा दिवपा खातीर भलायकी खात्याचे सतत यत्न आशिल्ल्याचें सांगलें.
ह्या वेळार राज्यभरांतल्या उत्कृश्ट सामुदायीक भलायकी केंद्रांचो आनी मुळाव्या भलायकी केंद्रांचो भोवमान केलो. तशेंच उत्कृश्ट सेवा दिवपी भलायकी कर्मचार्यांचोय ह्या वेळार भोवमान जालो.
गोवा वेवस्थापन संस्थेचे सहाय्यक प्रो. डॉ. सुरिया फडणीस, जेवण आनी वखदां प्रशासन खात्याच्यो संचालक डॉ. ज्योती सरदेसाय, भलायकी सेवा संचालनालयाच्यो उपसंचालक डॉ. रूपा नायक, उत्तर जिल्हो हॉस्पिटलाचे वैजकी अधीक्षक डॉ. वंदना धुमे आनी हेर हे कार्यावळीक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
