भांगरभूंय | प्रतिनिधी
-मणिपाल हॉस्पिटलांत मनयलो संवसारीक कॅन्सर दीस
पणजीः फाटल्या कांय वर्सांत गोंयांत ब्रेस्ट कॅन्सराचे दुयेंती वाडत आसात. हे संबंदी लक्षणां दिसल्यार वेळार उपाय केल्यार कॅन्सराचेर नियंत्रण दवरूं येता अशें मत डॉ. शेखर साळकार हांणी उक्तायलें.
शेनवारा संवसारीक कॅन्सर दिसा निमतान मणिपाल हॉस्पिटलान आयोजीत केल्ले कार्यावळींत ते उलयताले. ह्या निमतान आयएमए गोंयचे अध्यक्ष डॉ. संदेश चोडणकार, हॉस्पिटल संचालक सुरेंद्र प्रसाद आनी हेर हाजीर आशिल्ले.
तरणाट्या बायलां मदीं ब्रेस्ट कॅन्सराचें प्रमाण फाटल्या कांय वर्सांनी वाडत आसा. 25 वर्सां आदीं 50 ते 60 वर्सां पिरायेच्या बायलां मदीं ब्रेस्ट कॅन्सराचें प्रमाण चड आशिल्लें. आतां 30 ते 50 वर्सां पिरायेच्या बायलां मदीं हें प्रमाण वाडलां. एका अभ्यासा प्रमाण देशभरांतल्या गांवगिऱ्या वाठारां परस शारांतल्या वाठारांनी ह्या कॅन्सराचें प्रमाण चड आसा. तशेंच, गरीब आनी अशिक्षीत कुटुंबांत ब्रेस्ट कॅन्सराचें प्रमाण तुळेन उणें आसा अशें डॉ. साळकारान ह्या वेळार उलयतान सांगलें.
——–
डॉ. साळकारान सांगिल्लीं कॅन्सराचीं कारणां
– बदलिल्ली जीणे पद्दत, उसरां लग्न जावप, उसरां भुरगीं जावप, भुरग्याक आवयचें दूद दिवप ना, फास्ट फूड चड प्रमाणांत खावप, धूम्रपान, सोरो पियेवप अशा वेगवेगळ्या कारणांक लागून प्रेस्ट कॅन्सराची शक्यताय वाडत आसा.
– स्टेज 1 आनी 2 कॅन्सर बरे करप शक्य आसा. पूण स्टेज 3 आनी 4 कॅन्सराचेर नियंत्रण दवरप कठीण आसा. हे खातीर 20 ते 39 वर्सां पिरायेच्या बायलांनी दर म्हयन्याक तपासणी करप गरजेचें.
-आयएमए गोंय वतीन मानसीक भलायके खातीर सुरू केल्ले मोहिमेची म्हायती हे वेळार डॉ. चोडणकारान दिली. तशेंच उपचार करप शक्य नाशिल्ल्या आनी खाटीर पडून आशिल्ल्या दुयेंतींक इत्सा मरणा खातीर कायदेशीर प्रक्रिया करतले अशें तांणी सांगलें. तशेंच हे वेळार कॅन्सरांतल्यान बरीं जाल्ल्या दोन बायलांनी आपले अणभव सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
