भांगरभूंय | प्रतिनिधी
पणजी ः राज्य सरकारान नियोजीत केल्ल्या अॅप अग्रिगेटर धोरणाक सध्या जायत्या वटांनी विरोध जाता. जाल्यार जायत्या जाणांनी ताका येवकार दिला. मजगतीं, देशभरांतल्या जायत्या सुवातींनी अॅप बेस्ड टॅक्सी आनी बायक सेवा दिवपी मुखेल कंपनींचें लक्ष गोंया वटेन वळ्ळां.
देशभरांतल्या 215 वयर शारांनी येसस्वीपणान सेवा दिवपी बायक टॅक्सी आनी ऑटो सेवा दिवपी ‘रॅपिडो’ कंपनीय बेगीनूच गोंयांत प्रवेश करपाची तयारी केल्या. हे खातीर गोंय सरकाराच्या ‘ट्रान्सपोर्ट संकलक मार्गदर्शक तत्वां 2025’ चो अभ्यास सुरू केला. गोंयचे नवे नेम आधुनीक आनी सकारात्मक आसात, आनी ताका लागून फुडल्या दिसांनी टॅक्सी वेवसायांत सकारात्मक बदल जावपाची शक्यताय आसा अशें रॅपिडोचे सहसंस्थापक पवन गुंटूपल्ली हांणी ‘द हिंदू’ दिसाळ्याक दिल्ले मुलाखतींत सांगलें.
गोंयांतल्या नव्या मार्गदर्शक तत्वां प्रमाण सेवा सुरू करपी कंपनींक थळावें कार्यालय, भारतांत डेटा सांठो, ड्रायव्हरां खातीर भलायकी विमो अशो अटी पाळच्यो पडटल्यो. हे विशीं उलयतना गुंटुपल्ली हांणी सांगलें, हे नेम भागीदारी आनी जापसालदारके विशीं आसात, आनी ‘रॅपिडो’ सरकाराच्या धोरणांक पुराय सहकार्य करुन सेवा दितले. सध्या कंपनी गोंयांत थेट सेवा दिना तरी नेम आनी नेमा संबंदीत हेर गजाली पुराय जातकच रोखडीच काम सुरू करपाक तयार आसा अशें तांणी स्पश्ट केलें.
‘रॅपिडो पिंक’ – खाशेली सेवा
बायलांक सुरक्षीत येरादारी खातीर गोंयांतली ‘रॅपिडो पिंक’ सेवा बायलांक उपेगी पडटली अशें कंपनीचें मत आसा. ही सेवा चेन्नय सारक्या शारांनी येसस्वीपणान चालीक लायल्या. रॅपिडो प्लॅटफॉर्मांत सामील जाल्यार ड्रायव्हरांचें उत्पन्न उण्यांत उणें 30 टक्क्यांनी वाडटा आनी कंपनी ‘झीरो कमिशन’ मॉडेलाचेर काम करता जें ड्रायव्हरांच्या हितांचें आसा अशें गुंटुपल्ली हांणी स्पश्ट केलें. तशेंच रॅपिडो गोंयांतल्या थळाव्या टॅक्सी संघटनां वांगडा भागीदारी करून काम करपाचेर भर दितले अशेंय तांणी सांगलें.
रॅपिडो फकत पर्यटन केंद्रीत वाठारांनीच न्हय तर शार आनी गांवगिऱ्या वाठारांनीय सेवा दितले. रियल-टायम रायड ट्रॅकिंग, ड्रायव्हर सत्यापन आनी सुरक्षेची सावधानताय हीं तांचे सेवेचीं खाशेलपणां आसतलीं. गोंयांतले पर्यटक, थळावे आनी वाहन चालक हांचो विचार करुनूच काम करतले. गोंयांतली येरादारी वेवस्था सुलभ करपाक आमी सरकारा वांगडा वावुरतले अशें गुंटूपल्ली हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
