भांगरभूंय | प्रतिनिधी
प्रल्हाद जोशी : राष्ट्रीय परिशदेचें उक्तावण
भांगरभूंय । प्रतिनिधी
पणजी : राज्य सरकाराचे मागणी प्रमाण गोंयांत बेगिनूच केंद्र सरकाराची मान्यताय आशिल्लें वजन आनी माप चांचणी केंद्र सुरू करतले, अशी म्हायती केंद्रीय गिराय वेव्हार आनी भौशीक वितरण मंत्री प्रल्हाद जोशी हांणी दिली. शेनवारा पणजे आयोजीत वजन आनी माप नियंत्रकांचे राष्ट्रीय परिशदेच्या उक्तावण सुवाळ्यांत ते उलयताले. ह्या वेळार मुख्यमंत्री डॉ. प्रमोद सावंत, वजन आनी माप खात्याचे मंत्री दिगंबर कामत, केंद्रीय अतिरिक्त सचीव भारत खेरा, राज्य सचीव संजीव गडकार आनी हेर अधिकारी हाजीर आशिल्ले.
मंत्री जोशी हांणी सांगलें, केंद्र सरकार गोंयाक विवीध उपकरणां दितलें. हाका लगून तशेंच मान्यताय प्राप्त केंद्राक लागून गोंयच्या वजन आनी माप खात्याच्या कामांत आनीक अचुकता येतली. तेचवरी खात्याचें काम पारदर्शक जावन ताचो फायदो गिरायकांक तेचवरी वेपाऱ्यांक जातलो. केंद्र सरकार गिरायकांक प्राधान्य दिताच, ते भायर उत्पादक आनी वेपाऱ्यांच्यो हिता खातीर यत्न करतात. तांच्या ‘इझ ऑफ डुईंग बिझनेस’ खातीर विशेश तजविजी करतात. आमी ह्या गिरायक तशेंच वेपारी, उद्देजकां मदीं समतोल राखून फुडें वतात. केंद्रान वजन माप विशींच्या कायद्यांतल्यो पोरण्यो तजविजी बदल्ल्यात. आदीं सामान्य गुन्यांवा खातीर व्हड ख्यास्तीची तजवीज आशिल्ली. कांय प्रकरणांत वेपारी वा उत्पादकांक बंदखण लेगीत भोगची पडटाली. हातूंत आमी बदल करून नेम सदळ केल्यात. अशें आसलें तरीय वेपारी आनी उत्पादकांनी लेगीत जापसालदारकेन वागप गरजेचें आसा. तांणी गिरायकांचो विस्वास मोडचो न्हय. वजन आनी माप हें दीसपट्टे जिणेंतलो म्हत्वाचो घटक आसा. आमी खात्यांत डिजिटल तंत्रज्ञान हाडटात. पारदर्शक बाजारपेठे खातीर आमचे यत्न चल्ल्यात, अशेंय जोशी हांणी सांगलें.
कुडचड्यार अत्याधुनीक लॅबोरेटरी : मुख्यमंत्री
विकसीत भारत 2047 चे सपन साकार करपांत वजन आनी माप खातें खात्याची भुमिका म्हत्वाची थारतली. केंद्रा कडल्यान दिल्ले मजतींतल्यान कुडचड्यार अत्याधुनीक लॅबोरेटरी उबारतले. हाका लागून गोंयांत अचूक मापन उपकरणां सयत पडटाळणी आनी तपासणी चड बरी जातली, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
