गोंयांत बेगिनूच आपत्ती वेवस्थापन अभ्यासक्रमः मुख्यमंत्री

भांगरभूंय | प्रतिनिधी

पणजीः फुडल्या शिक्षणीक वर्सा सावन उजो पालोवपी दळ आपत्ती वेवस्थापन, उजो पालोवपाचो ल्हान अभ्यासक्रम सुरू करतले. ह्याच विशयाचेर डिप्लोमा अभ्यासक्रम सुरू करपाचोय सरकार विचार करता अशें मुख्यमंत्री डॉ. प्रमोद सावंत हांणी सांगलें. शुक्रारा नव्यान तयार केल्ल्या फोर्स इमारतीच्या उक्तावण सुवाळ्यांत ते उलयताले. संचालक नितीन रायकार, मुखेल सचीव डॉ. व्ही कंदावेलू, आमदार जेनिफर मोन्सेरात, केदार नायक आनी हेर अधिकारी हाजीर आशिल्ले.

हेर राज्यांचे तुळेंत गोंयांतल्या उजो पालोवपी दळाच्या मुखेल कार्यालयांत बऱ्या दर्ज्याच्यो जायत्यो सुविधा उपलब्ध आसात अशें मुख्यमंत्र्यांनी सांगलें. हांगाच्या प्रशिक्षण केंद्रांत वेगवेगळ्या राज्यांतले उजो पालोवपी जवान प्रशिक्षण घेतात. कांय विदेशी नागरिकांनीय फाटल्या वर्सा हें प्रशिक्षण पुराय केलां. थळाव्या तरणाट्यांक हांगा स्थापन केल्ल्या सुविधांचो वापर करपाक मेळचो म्हणून नवो अभ्यासक्रम सुरू करतले. हो अभ्यासक्रम पुराय केले उपरांत फोर्सा कडल्यान प्रमाणपत्र दितले.

सध्या उज्या सयत हेर प्रकारच्या संकश्टांत वाड जाल्या अशें तांणी सांगलें. वेगवेगळ्या मळार आपत्ती वेवस्थापन अभ्यासक्रम पुराय केल्ल्या व्यक्तींची मागणी वाडत आसा. हो अभ्यासक्रम पुराय केल्यार तरणाट्यांक रोजगाराचीय संद मेळटली. अशा प्रशिक्षीत लोकांची गरज विदेशांत आसा. अभ्यासक्रम पुराय करपी लोकांक बोटींनी वा हेर कडेन रोजगार मेळटलो. कुशळटाय विकासा वरवीं रोजगार निर्माण करपाचो हो सरकाराचो आनीक एक यत्न अशें मुख्यमंत्र्यान सांगलें.

——————

नव्या इमारती खातीर 36.50 कोटी खर्च

उजो पालोवपी दळाच्या मुखेल कार्यालयाचें नवनिर्माण आनी प्रशिक्षण आनी प्रशासकीय खात्या खातीर नवी इमारत बांदपा खातीर सुमार 36.50 कोटी रुपया खर्च जाल्यात. तातूंत कॅन्टीन, कार्यशाळा, बॅरेक, प्रशिक्षण केंद्र, परिशद घर, वाचनालय, प्रयोगशाळा, एव्ही लॅब हांचो आस्पाव जाता.

———————-

अग्नी संदेश अॅपाचें अनावरण

ह्या संदर्भांत अग्नी संदेश मोबायल अॅपाचें मुख्यमंत्र्यांनी उक्तावण केलें. ह्या अॅपा वरवीं एका वाठारांत उजो वा हेर आपत्कालीन घडणुकेची म्हायती दळाच्या नियंत्रण कक्षांतल्यान मोबायलाचेर मेळटली. फुडल्या कांय म्हयन्यांत हो अॅप सगळ्यांक मेळटलो.