भांगरभूंय | प्रतिनिधी
पणजी ः गोंयचे दर्या शिमेचेर बेकायदेशीर रितीन भितर सरून बुल ट्रॉलिंग करपी मालपे कर्नाटकांतल्यो दोन बोटी नुस्तेमारी खात्यान जप्त केल्यात. शेनवारा सकाळीं सुमार पांच वरां मजगतीं ही घडणूक घडली. धरिल्ल्या बोटींतल्या नुस्त्यांचो लिलाव करून बोट धनयांचेर खर कारवाय करतले अशें नुस्तेंमारी मंत्री नीळकंठ हळर्णकर हांणी सांगलें.
फाटल्या कांय दिसां सावन थळाव्या नुस्तेकारांनी मालपेंतल्यान बोटी गोंयच्या दर्या शिमेचेर भितर सरून बेकायदेशीर रितीन नुस्तेंमारी करतात अशी कागाळ केल्ली. हे विशीं कांय दिसां आदीं पुलिशेंतूय कागाळ दाखल जाल्ली. हाचे उपरांत मंत्री नीळकंठ हळर्णकार हांणी कर्नाटक नुस्तेमारी खात्याच्या वरिश्ठ अधिकाऱ्यां कडेन चर्चा केली. पूण तरी लेगीत मालपे सावन बोटी गोंयांत येवप चालूच आशिल्ले. हाचे उपरांत नुस्तेमारी खात्यान अशो घडणूक आडावपा खातीर एक टास्क फोर्स नेमलो. मुख्यमंत्री डॉ. प्रमोद सावंत हांणी लेगीत अशा बोटींचेर खर कारवाय करपाची शिटकावणी दिल्ली. हाचे उपरांत शेनवारा सकाळीं ही कारवाय केल्या. ह्या कारवाये वेळार आनीक दोन बोटी पळून वचपाक येसस्वी जाल्यो. जप्त केल्ल्यो बोटीं पणजी जेटींत हाडल्यात. हाचें फुडेय अशी कारवाय चालूच उरतली अशें आश्वासन मंत्री हळर्णकार हांणी दिले.
दंडाची रक्कम वाडोवपाचो प्रस्ताव
खात्याचे अधीक्षक चंदेश चंद्रेश हळदणकार हांणी सांगलें, मुख्यमंत्री डॉ. सावंत हांणी दिल्ल्या आदेशा प्रमाण काल खात्याच्या अधिकाऱ्यांची बसका जाली. ते प्रमाण आमी आयज ही कारवाय केल्या. जप्त केल्ल्या बोटींचेर कायद्या प्रमाण कारवाय जातली. दंडाची रक्कम 10 लाख रुपया मेरेन वाडोवपाची प्रक्रिया खात्यान सुरू केल्या. कायद्यांत बदल जाल्यार ही रक्कम वाडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
