गोंयांत बायलां वयले अत्याचार वाडल्यात

भांगरभूंय | प्रतिनिधी

फ्रान्सीस कुएल्हो : दर दिसा बायलां संदर्भांतलो एक गुन्यांव

भांगरभूंय | प्रतिनिधी

पणजीः गोंयांत कायदो आनी सुवेवस्था बाबत जायत चल्ल्या. फाटल्या दोन वर्सांचे तुळेंत बलात्कार आनी बायलांचेर जावपी अत्याचारां मदीं वाड जाल्या. गोंयांत ‘रेप ड्रग’ जें बायलांक घुंवळावन बलात्कार करपा खातीर वापरतात ताचें प्रमाण वाडलां, असो गंभीर आरोप आम आदमी पक्षान केला. पणजे घेतिल्ले पत्रकार परिशदेंत आपाचे फुडारी फ्रान्सीस कुएल्हो हांणी ही म्हायती दिली. ह्या वेळार पक्षाची फुडारी सेसील रॉड्रिग्स, संदेश तळेकार आनी सलमान खान हजर आशिल्ले.

ह्या वेळार उलयतना कुएल्हो हांणी सांगलें, फाटलीं 10 वर्सां आप कायदो आनी सुवेवस्थेचो प्रस्न हातांत घेत आसा. गोंयांत गुन्यांवाचो नियाळ घेवपा खातीर आमी राष्ट्रीय क्रायम रिकोर्ड ब्युरोच्या (एनसीआरबी) अहवालाचो सोद घेवपाक सुरवात केली. मात 2022 उपरांत एनसीआरबीचो एकूय अहवाल उजवाडाक येवंक ना. हें पळोवन आमकां धपकोच बसलो. फाटल्या तीन वर्सां सावन भाजपान हो डेटा लिपोवन दवरला. देखून आमी स्वता डेटा सोदपाची मोहीम हातांत घेतली, अशें कुएल्हो हांणी सांगलें.

आमकां हो डेटा मेळटकत तातूंत बायलां आड जावपी गुन्यांवां मदीं वाड पळोवन धपको बसलो. 2023 त गोंयांत 288 बायलां आड गुन्यावांची नोंद जाल्ली आनी 2024 त हातूंत वाड जावन बायलां आडच्या गुन्यावांत 365 मेरेन वाड जाली. हाचो अर्थ दर दिसा बायलां संदर्भांतलो एक गुन्यांव नोंद जाता, असो आरोप कुएल्हो हांणी केलो.

2024 त 106 बलात्कार आनी 29 खुनांची गोंयांत नोंद जाल्ली आनी हो आंकडो 2023 आनी 2022 परस चड आसा. गोंयांत ड्रग्स आनी बलात्काराचो सरळ संबंद येता. गोंयांत हालींच धरिल्ल्या 85 किलांच्या 6.75 कोटींच्या घुंवळे वखदां भितर 12 लाख मोलाच्या ‘जीएचबी’ ह्या ड्रग्साचो आस्पाव आशिल्लो. ताका ‘रेप ड्रग’ म्हणटात. चलयांक डेटीक व्हरून हें ड्रग्स दीत जाल्यार तीं घुंवळटात, बेशुद्ध जातात, मागीर तांचेर बलात्कार करतात, अशें कुएल्हो हांणी सांगलें. मुख्यमंत्री डॉ. प्रमोद सावंत हांणी गृह, भौशीक बांदकाम खातें हीं म्हत्वाचीं खातीं आपले कडेन दवरल्यांत. मात परिस्थिती पळयल्यार ह्या खात्यांची काम करपाची पद्दत इबाडल्या. भाजपान काँग्रेसीचे आमदार आयात केल्यात. तांकां रिते बसोवचे परस गृह खातें तरी चलोवपाक दिवचें, अशी मागणी कुएल्हो हांणी केली.