भांगरभूंय | प्रतिनिधी
पणजीः राज्यांत कायदो आनी सुवेस्था बाबत जायत चल्ल्या. फाटल्या दोन वर्सांचे तुळेंत बलात्कार आनी बायलांचेर जावपी अत्याचारां मदीं वाड जाल्या. गोंयांत ‘रेप ड्रग’ जें बायलांक घुंवळावन बलात्कार करपा खातीर वापरतात ताचें प्रमाण वाडलां, असो गंभीर आरोप आम आदमी पक्षान केला. मुख्यमंत्री डॉ. प्रमोद सावंत हांणी गृहमंत्री म्हूण राजीनामो दिवचो अशी मागणीय तांणी केल्या.
पणजे जाल्ले पत्रकार परिशदेंत आपाचे फुडारी फ्रान्सिस कुएल्हो हांणी ही म्हायती दिली. ह्या वेळार पक्षाची फुडारी सेसिल रोड्रीग्स, संदेश तळेकार आनी सलमान खान हजर आशिल्ले.
ह्या वेळार उलयतना कुएल्हो हांणी सांगलें, फाटले १० वर्सां आप कायदे आनी सुवेस्थेचो प्रस्न हातांत घेत आसा. गोंयांत गुन्यांवाचो नियाळ घेवपा खातीर आमी राष्ट्रीय क्रायम रिकोर्ड ब्युरोच्या (एनसीआरबी) अहवालाचो सोद घेवपाक सुरवात केली. मात २०२२ उपरांत एनसीआरबीचो एकूय अहवाल उजवाडाक येवंक ना. हें पळोवन आमकां धक्कोच बसलो. फाटल्या तीन वर्सां सावन भाजपान हो डेटा लिपोवन दवरला. देखून आमी स्वता डेटा सोदपाची मोहीम हातांत घेतली, अशें कुएल्हो हांणी सांगलें.
आमकां हो डेटा मेळटकत तातूंत बायलां आड जावपी गुन्यांवां मदीं वाड पळोवन धक्को बसलो. वर्स २०२३ त गोंयांत २८८ बायलां आड गुन्यावांची नोंद जाल्ली आनी २०२४ वर्सा हातुंत वाड जावन बायलां आडच्या गुन्यावांत ३६५ मेरेन वाड जाली. हाचो अर्थ दर दिसा बायलां संदर्भांतलो एक गुन्यांव नोंद जाता, असो आरोप तांणी केलो.
२०२४ वर्सा १०६ बलात्कार आनी २९ खुनांची राज्यांत नोंद जाल्ली आनी हो आंकडो वर्स २०२३ आनी २०२२ परस चड आसा. गोंयांत ड्रग्स आनी बलात्काराचो सरळ संबंध येता. गोंयांत हालींच धरिल्ल्या ८५ किलांच्या ६.७५ घुवळे वखदां भितर १२ लाख मोलाच्या ‘जीएचबी’ ह्या ड्रग्साचो आस्पाव आशिल्लो. ताका ‘रेप ड्रग’ म्हणटात. चलयांक डेटीक व्हरून हें ड्रग्स दित जाल्यार तीं घुंवळटात, बेशुद्ध जातात, मागीर तांचेर बलात्कार करतात, अशें कुएल्हो हांणी सांगलें.
मुख्यमंत्री डॉ. प्रमोद सावंत हांणी गृह, भौशीक बांदकाम खातें हीं म्हत्वाचीं खातीं आपले कडेन दवरल्यांत. मात परिस्थिती पळयल्यार ह्या खात्यांची काम करपाची पद्दत इबाडल्या. भाजपान कॉंग्रेशीचे आमदार आयात केल्यात. तांकां रिते बसोवचे परस गृह खातें तरी चलोवपाक दिवचें, अशी मागणी कुएल्हो हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
