गोंयांत बायलां मतदार मतदानाचो हक्क वापरपी देशांत पांचवे सुवातेर

भांगरभूंय | प्रतिनिधी

पणजीः गोंयांतल्यो बायलां मतदार आपल्या मतदानाचो हक्क वापरपांत देशांत पांचवे सुवातेर आसात. वेंचणूक आयोगान 2024 वेंचणूक चे लोकसभा वेंचणुकेच्या अहवाला वयल्यान ही म्हायती जाहीन केल्या. ते प्रमाण 2024 वर्सा गोंयांत 51.94 टक्के मतां मेळ्ळीं. बायलां मतदारांची राष्ट्रीय सरासरी 48.38 टक्के आशिल्ली. टपाल मतदानाचो ह्या अहवालांत आस्पाव ना.

अहवाला प्रमाण, 2024 वर्साचे लोकसभा वेंचणुके खातीर गोंयांत वट्ट 11 लाख 79 हजार 344 मतदारांची नोंदणी जाल्ली. हातूंत 6 लाख 7 हजार 723 (51.52 टक्के) बायलां मतदार आशिल्ल्यो. वट्ट नोंदणीकृत मतदारांतल्यान 8 लाख 96 हजार 978 जाणांनी मतदान केलें. हातूंत 4 लाख 65 हजार 881 (51.94 टक्के) बायलां मतदार आशिल्ले. मतदार वळेरेंत नांवां आशिल्ल्या वट्ट बायलां मतदारांतल्या 76.66 टक्के मतदारांनी मतदान केलें.

2014 वर्साचे लोकसभा वेंचणुकेंत गोंयांत मेळिल्ल्या वट्ट मतांतले 51.38 टक्के बायलांक मेळ्ळे. 2029 वर्सा हीच टक्केवारी 51.75 आशिल्ली. दोनूय फावटीं ही टक्केवारी राष्ट्रीय सरासरी परस चड आशिल्ली. देखून 2024 वर्साचे वेंचणुकेंत बायलांक मतदान करपाचो विक्रम जाला. फाटल्या तीन लोकसभा वेंचणुकांनी बायलां मतदान करपाची टक्केवारी वाडत आसा. दादल्यांच्या मतदानाची टक्केवारी मात्शी उणी जाल्या अशें अहवालांतल्यान दिसून येता.

2024 वर्सा अरुणाचल प्रदेशांतल्या बायलांक मतदानाचो हक्क वापरपाच्या मळार पुराय देशाचे तुळेंत पयल्या क्रमांकाचेर आशिल्ले. 2024 वर्सा अरुणाचल प्रदेशांतल्या वट्ट मतां मदीं बायलांचो वांटो 52.22 टक्के आशिल्लो. जाल्यार केरळांतल्या बायलांक 52.09 टक्क्यांनी दुसरे सुवातेर आशिल्ले. पुडुचेरीच्या संघराज्यांत वट्ट मतदारांतल्यान 53.2 बायलां मतदारांची टक्केवारी आशिल्ली. जाल्यार लद्दाखांत हें प्रमाण 50.61 टक्के आशिल्लें.