भांगरभूंय | प्रतिनिधी
शेतकी, वैयक्तीक, उद्देगीक, शिक्षण, गृह, मुळाव्यो सुविधा अशा रिणांचो आस्पाव
पणजी: फाटल्या अर्थीक वर्सांत गोंयांतल्या विवीध शेड्युल वेवसायीक बँकांनी 31 हजार 522 कोटी रुपयांचें रीण मंजूर केलां. हाचोच अर्थ गोंयांत 2023-24 वर्सा दिसाक सरासरी 86.36 कोटी रुपयांचीं रिणां मंजूर जाल्यांत. हातूंत शेतकी, वैयक्तीक, उद्देगीक, शिक्षण, गृह, मुळाव्यो सुविधा अशा विवीध रिणांचो आस्पाव आसा. रिझर्व्ह बँक ऑफ इंडियान (आरबीआय) जाहीर केल्ल्या अहवालांतल्यान ही म्हायती मेळ्ळ्या.
अहवाला प्रमाण फाटल्या पांच अर्थीक वर्सांत गोंयांत मंजूर जावपी रिणाची रक्कम 11 हजार 376 कोटी रुपयांनी वाडल्या. अर्थीक वर्स 2019-20 त गोंयांत 20 हजार 146 कोटी रुपया रीण मंजूर जाल्लें. 2023-24 वर्सा तें वाडून 31 हजार 522 कोटी रुपया जालें. हें फाटल्या धा वर्सांत मंजूर केल्लें सगल्यांत चड रीण आसा. तशेंच गोंयांत 2022-23 वर्सा 27 हजार 4 कोटी, 2021-22 वर्सा 24 हजार 9 कोटी जाल्यार 2020-21 वर्सा 22 हजार 166 कोटी रुपया रीण मंजूर जाल्लें.
पुराय देशाचो विचार करीत जाल्यार अर्थीक वर्स 2023-24 त 169 ट्रिलियन कोटी रुपयांचें रीण मंजूर केलां. सगल्यांत चड 40.30 लाख कोटी रुपया रीण महाराष्ट्रांत मंजूर जालां. कर्नाटकांत 12.38 लाख कोटी, तामिळनाडूंत 15.82 लाख कोटी जाल्यार गुजरातांत 9.94 लाख कोटी रुपया रीण मंजूर जाल्लें. सिक्कीमांत सगल्यांत उणें म्हणल्यार 6583 कोटी रुपया रीण मंजूर जालें. केंद्र शासीत प्रदेशांत दिल्लींत सगल्यांत चड 17.03 लाख कोटी जाल्यार लक्षद्वीपांत सगल्यांत उणें 168 कोटी रुपया रीण मंजूर जालें.
अहवालांत राज्यांतल्या विवीध शेड्युल बँकांक विवीध मळा कडल्यान येणें बाकी आशिल्ल्या रिणाच्या रकमेची म्हायती दिल्या. ते प्रमाण अर्थीक वर्स 2023-24 सोंपता म्हणसर 1754 कोटी रुपयांचें शेतकी रिणाची रक्कम येवप बाकी आशिल्ली. जाल्यार 202-23 त हीच रक्कम 1431 कोटी रुपया इतली आशिल्ली. जाल्यार 2023-24 सोंपता म्हणसर उद्देग मळा कडल्यान बँकांक 4938 कोटी रुपया येणें बाकी आशिल्लें. 2022-23 सोंपता म्हणसर ही रक्कम 4497 कोटी रुपया आशिल्ली.
17 हजार कोटी पर्सनल लोन येवप बकी
गोंयांत फाटल्या कांय वर्सांत पर्सनल लोन घेवपाच्या प्रमाणांत वाड जाल्या. पर्सनल लोनाचें कळंतर चड आसलें तरी काळ आनी रक्कम उणी आशिल्ल्यान ह्या लोनाक प्राधान्य दितात. 2023-24 सोंपता म्हणसर राज्यांतल्या विवीध बँकांनी 17 हजार 272 कोटी रुपयांच्या पर्सनल लोनाची रक्कम येवप बाकी आशिल्ली. 2022-23 त ही रक्कम 14 हजार 493 कोटी रुपया आशिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
