भांगरभूंय | प्रतिनिधी
पणजी : वातावरणांत तयार जाल्ल्या ‘शिअर झोन’क लागून गोंयांत फुडले कांय दीस पावसाचें प्रमाण वाडपाची शक्यताय आसा. हाका लागून हवामान खात्यान राज्यांत आयच्यान, मंगळार ११ जून मेरेन वादळ वार्या सयत पावसाची शक्यताय उक्तायल्या. ते प्रमाण ह्या पांच दिसां खातीर ऑरेंज अलर्ट जारी केला. जाल्यार १२ आनी १३ जुनाक मध्यम स्वरूपाच्या पावसाची शक्यताय आसा.
७ ते ११ जून मजगतीं गोंयांत चोवीस वरां २.५ इंचा परस चड पावस पडपाची शक्यताय आसा. फाटल्या चोवीस वरांनी राज्यांत सरासरी १.२२ इंच पावसाची नोंद जाली. १ ते ७ जून मजगतीं राज्यांत सरासरी २.४८ इंच पावसाची नोंद जाल्या. ह्या काळांत राज्यांत सुमार ४ इंच पावसाची नोंद जाता. अंदूं पावसाच्या प्रमाणांत ३७.८ टक्के तूट आसा.
फाटल्या चोवीस वरांनी पेडणें आनी सांखळे सगळ्यांत चड २.५७ इंच पावसाची नोंद जाली. वाळपय २.३१ इंच, म्हापश्यां १.९८ इंच जाल्यार सांग्यांर १.७८ इंच पावसाची नोंद जाली. पावसाक लागून राज्यांतलो चडांत चड तापमान देंवलो. शुक्रारा पणजे चडांत चड ३२ अंश जाल्यार मुरगांवां ३१.६ अंश सेल्सिअस तापमानाची नोंद जाली. फुडले पांच दीस चडांत चड तापमान २९ ते ३१ अंश सेल्सिअस मजगतीं उरपाची शक्यताय खात्यान उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
