भांगरभूंय | प्रतिनिधी
पणजी : कांय दीस थारो घेतले उपरांत दक्षीण- पश्चीम मान्सून परत सक्रीय जावपाचीं चिन्नां दिसता. भारतीय हवामान खात्यान दिल्ले म्हायती प्रमाण, १४ जून सावन महाराष्ट्र आनी कर्नाटकांत नेटान पावस पडपाची शक्यताय आसा. जाल्यार फाल्यां १२ जुनाक गोंयांत रेड अलर्ट आनी १३ जुनाक ऑरेंज अलर्ट जारी केला.
अंदूं मान्सून अपेक्षे परस बेगीन म्हणजे २५ मेक गोंयांत आनी महाराष्ट्रांत दाखल जाल्लो. मात ताचे उपरांत कांय सुवातांचेर पावसान विसव घेतिल्लो. हवामान खात्याच्या म्हणण्या प्रमाण, हवामानांतल्या बदलाक लागून मान्सुनान परत नेट धरला.
हवामान विभागान स्पश्ट केलां, कोकण, गोंय, मराठवाडो, मध्य महाराष्ट्र, कर्नाटक आनी मध्य प्रदेश ह्या वाठारांनी पावसाचो नेट वाडटलो. कांय सुवातांचेर घोग्यांनी पावस आनी वार्याचो वेग ४० ते ६० किमी प्रती वर आसपाची शक्यताय आसा.
पुणे आनी लागसारच्या वाठारांनी १२ जून सावन पावस सुरू जावपाचो हवामान खात्याचो अदमास आसा. हाका लागून जायत्या दिसां सावन पावसाची वाट पळोवपी शेतकार आनी नागरी समाधानी जातले. एका निरीक्षणा प्रमाण जून म्हयन्यांत आतां मेरेन महाराष्ट्रांत १००७%, मध्य प्रदेशांत ५८६%, तेलंगणांत ३४१% आनी कर्नाटकांत २३४% चड पावसाची नोंद जाल्या. मात हो पावस सगल्याक एकसमान जायनासतना कांय थारावीक सुवातांचेरूच चड पडला.
गोंयच्या नागरिकां खातीर सुचवण्यो
गोंयांत १२ जुनाक रेड अलर्ट जारी केला. हाचो अर्थ पावसाचो नेट चड आसपाची शक्यताय आसा. पालसणां कोसळप, हुंवाराची स्थिती निर्माण जावप, वीज पडप, असल्या घडणुकां पसून वाटवपा खातीर नागरिकांनी सुरक्षीत सुवातेर रावचें, असो उलो हवामान खात्यान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
